A rang thei ang berin kawng ṭha siam kan tum - CM Zoramthanga

Chief minis­ter Zoramthanga chuan Raj Bhavan tuala sorkar thar lak luhna inkhawm neih zawhah thuthar thehdarhtute a kâwm a; a rang thei ang berin kawng ṭha siam an tum thu a sawi.

Zoramthanga chuan, kawng chu thla hnih khat, kum khat chhunga ṭha taka siam zung zung theih a nih loh thu sawiin, "Chutiang ni mah se, a rang thei ang berin a chhe zual lai siam kan tum. Theihtawp chhuahin kawng ṭha neih kan tum," a ti.

"Aizawl khawpui hi traffic jam miah loa siam chu a harsa dawn a, jam awm mang lohna atan kawng chhawng leh parking hmangin ṭan kan la ang. Kawng péng zawng zawngah kawng chhawng a siam theih loh ang a, a main line-ah erawh kan siam ang," a ti.

Chief Minister ṭum thum a nihna a nih thu sawiin Zoramthanga chuan, "Ṭum khat ka CM-naah khan experience ka neih loh avangin a hahthlak a, hmachhawp leh tihhlawhtlin ṭhat pawh ka nei hman lo. Term hnihnaah erawh a zia viau. Opposition-ah kum 10 kan awm chhungin kan inzir nasa a, bul ṭha takin kan ṭan thei tawh kan beisei a ni," a ti a; SEDP hmangin Mizoram chu India rama per capita income sang ber zinga miah hun rei lutuk lo chhungin hlankai an tum thu a sawi.

Zoramthanga chuan, zu leh drugs avangin mipui an mangang nia sawiin, "Chuvangin, zu khap a, drug-te theihtawpa control tum a ni. Zu leh drug-in a tihbuaite chhanchhuahna tur camp, India rama a ṭha berte zinga mi din a, lian tham a za tél mai ni lo, a sang tél neih kan tum. Sorkar, doctor, kohhran leh NGO-te nen nasa taka ṭan kan tum a ni," a ti.

Chief Minister chuan zawhna chhangin, dis­trict-a puan tawh Khaw­zawl, Hnahthial leh Saitual-te chu an tipuitling dawn tih a sawi a, "Kan ṭan nghal ang a, khami tana sum sanction erawh chu a awm hrih lo," a ti a; budget tharah district tihpuitlinna tur sum daha tihpuitlin a nih tur thu a sawi.

Vanglaini palai zawhna chhangin Zoram­thanga chuan, "Sorkar hmasa khan thil ṭha tam tak an ti a, thil ṭhate chu kan chhunzawm ang. Tihfuh lohte chu kan chhunzawm lo ang. Sorkar hnathawk eirukna nena inhnamhnawihte chu dan angin kan hrem zel ang," a ti.

BJP kaihhruai NEDA-a an tel chungchangah, tunah chuan an la tel zel rih a, an party thuneitu sangin thuthar a neih loh chuan an la tel zel dawn tih a sawi bawk.