Tharum thawhna leh buaina lakah Fimkhur turin Police-in mipui an ngen

Mizoram Police-a Public Relations Officer (PRO) chuan thuchhuah siamin, tharum thawhna leh buaina laka Mizo­ram a fihlim theih nan mi tinte fimkhur turin a ngen.

Police thuchhuah chuan, tunlai khawvel changkang zelah inbiakpawhna leh chanchinthar thehdarh kawngah nasa takin hmasawnna a thleng a, mi tinin an kutah inbiakpawhna leh chanchinthar ena thehdarh theih­na hmanrua mobile phone/smart phone a awm tawh avangin fim­khur a ngaih thu a tarlang.

Awlsam tak leh rang taka thil hriat zung zung theih a nih tawh avangin dâwt leh belhchian dâwl lo te, infuihpawrhna leh inhmélmâkna thlen thei thu awlsam taka thehdarh theih a ni tawh tih sawiin Police thuchhuah chuan, "Chanchinthar belhchian dâwl lo te, mi dang tithlabár thei leh chi leh chi, mimal leh pawl inkara inhuatna thlen thei thilte thehdarh theih a nih avangin, finfiah hmasa lo chuan tumahin thu thehdarh lo tur leh fiamthuna atan pawh hmanglo turin kan ngen a ni," a ti.

Police-te chuan, changkan dan milin dan leh thupek zawm kawngah pawh ṭhanharh a ṭul thu sawiin, "Mipui pungkhawm zinga harh fîm lo leh au ring apiang thu awiha mipuite'n tlángchìl hmanga pawi khawih maite a awm ṭhin," an ti a; khaw­tlang hruaitu leh dan keng­kawhtute pawh ngaichâng thei loa thuhnu dáwn hauh loa chêt mai a awm theih avangin, thil pawi tak siamṭhat theih loh a thleng ve fo ṭhin tih an sawi.

Ram leh mipui himna atan dan kengkawhtu magistrate leh police thu awih leh thawhpui thiam a ṭul tak zet thu sawiin police thuchhuah chuan, "Thuneitu leh kengkawhtute dîpdâl loa ṭanpui zawk hi khua leh tui mawhphurhna a ni. Insawisak leh tlángchîl ang chite phei chu Kristian ramah chuan thleng ve tura mawi a ni lo tih hre thar leh ila, police-te hnathawh leh hnu chhuina tur a tibuai zawk ṭhin a ni," a ti.

Supreme Court-in July 17, 2018-a thupek (order) a chhuah angin, sorkar laipui leh state sorkar zawng zawngte chu mipui pawikhawihna ven kawnga chak zawka hma la tura tih an ni tih sawiin, "Mizoram sorkar pawhin district tina SP-te chu nodal officer-ah ruatin, amah pui turin task force dina bawhzui mek a ni," an ti a; task force-te chuan thu dik lo thehdarh vanga mipuite tharum thawh theihna emaw, buaina chhuak theite veng turin chak taka hmalak mek a nih thu an tarlang.

Mizoram Police thuchhuah chuan, Krismas leh kum thar lo thleng turah mi tinin hlim leh thlamuang taka hun an hman theih nan sorkar khap thil - hâlpuah, hâlmawi leh silai lem, a mû kâp chhuak theite zuar lo tur leh hmang/hâl lo turin mi tin an chah a; ram leh mipui himna leh rálmuanna tichhetu leh buaina thlentu ni lo a, a vawng himtu nih turin mipui an chah a ni.