Mizo People Convention -in Thlan tlinte an lawmpui

Mizo People Convention (MPC), Manipur chuan thuchhuah siamin, Mizoram tluang taka neih a ni chu lawmawm an tih thu ahn tarlang a, "India rama general election awm tawh zinga entawn tlak, thianghlim leh zahawm niin kan hria a, khatiang taka ropui leh inlungrualna Mizo mipuite'n an lantir kha Mizoram páwna Mizote hian mawi kan tiin thlamuanthlak kan ti hle a ni," an ti.

MPC, Manipur chuan, MLA atana thlan tlin zawng zawngte an lawmpui thu sawiin, "Ai an awh mipuite tan dik taka roreltu an nih ngei ring chungin an kal zelna turah duhsakna hlu ber kan hlan a ni," an ti a; sorkarna siamtu MNF party chu an lawmpui a, mipuite tan dik tak leh thlei bik nei loa mi tin huapzo sorkar siam turin an ngen.

MPC chuan, "Mizoram sorkar hi Zofa hmun hrang hranga awmte tana belh tlak leh innghahna tlak an nih tawh fo angin, sorkar rin ngam an ni ngei zel ang tih kan beiseiin kan ring tlat a ni," an ti bawk.