Brahmaputra chunga lei dawh thar hming tur rawtna thlen

Assam-a Dibrugarh District Committee of the All Assam Ahom Sabha chuan Prime Minister Narendra Modi hnenah memorandum thehlut in Bogibeel bul, Brahmaputra chunga lei dawh thar hming chu Ahom Kingdom founder 'Chaolung Siu-ka-pha' hmingchawia phuah an ngiat.

Brahmaputra chunga lei dawh thar, ramchhunga lei sei ber Bogibeel brigde tia hriat hi December 25 hian PM Modi chuan a hawng dawn a ni. Chaolung Siu-ka-pha hi Bor Axom (composite Assam) emaw Seven Sisters and the Axomiya society emaw tia hriat ṭhin dintu nia sawi a ni.

Memorandum copy dang hi Railway Minister Piyush Goyal, Road Transport and Highways Minister Nitin Gadkari leh Assam Chief Minister Sarbananda Sonowal-te hnenah pawh pek a ni bawk. November thla khan All Assam Chutiya Students Union chuan Bogibeel bridge hi Chutiya lalnu Sati Sadhani hmingchawia a hming phuah an lo rawt tawh bawk a, Sati Sadhani hian Chutiya Dynasaty-ah 1522 leh 1524 inkar khan ro a rel a ni. Heng zirlai pawl te hian an thil phut hi tihhlawhtlin a nih loh chuan Brahmaputra luia zuanthlakah an lo vau tawh bawk a ni.

August thla khan Dibrugarh MLA Prasanta Phukan chuan Prime Minister hlui Atal Bihari Vajpayee hmingchawia phuah a lo rawt tawh bawk. Bogibeel brigde hi 1998 khan, khatih hunlaia Prime Minister H.D. Deve Gowda chuan a dawhna tur lungphum a phum a, 2002 khan Vajpayee chuan hnathawh ṭanna tur hawngin December 25 hian hawn a ni dawn ta a ni. Bogibeel brigde hi km 4.94-a thui niin rel kawng leh motor kawng awmkawp a ni.