Pawngsualtu 2 kum 10 tâng turin hrem

Nimin khan hmeichhe pawngsualtu mi pahnih - Lalpianglawma (37), Sihfa, Saitual district leh HM Ronghaka (58) s/o H Hauhkhuma, Dulte, Khawzawl district-te chu court-in kum 10 chhung jail-a táng turin a hrem.

Court judgement-a a lan danin, Lalpianglawma hian May 29, 2018 khan nu pakhat chu amah chauha a awm laiin hmai tuam chungin chem nen a luhkhung a, vau betin a pawngsual a ni. Chumi ní chuan pawngsual tâwktu chuan Saitual Police Station-ah FIR a thehlut a, police-te chuan Lalpianglawma chu an man nghal a ni.

Thubuai hi Aizawla Additional District & Session Court-ah ngaihtuah a ni a; judge Liansangzuala chuan police-te thil hmuh chhuah te, thuhretute thusawi leh Lalpianglawma thusawite a zir chian hnuah nimin khan thutlukna a siam a, Lalpianglawma chu kum 10 táng tur leh Rs. 3,000 chawi turin a hrem. Pawisa a chawi tur a pek loh chuan thla ruk dang tàn belh turin a ti bawk.

Champhai District Child Protection Society-te'n May 14, 2015-a Dulte khuaa awareness campaign an neih ṭumin, tleirawl pakhatin pawngsual a tawh thu report an dawng a, Khawzawl Police Station-ah FIR an thehlut nghal. Police-te chuan thil thleng chu chhui zuiin, pawngsualtua puh HM Ronghaka an man a, POCSO Act hnuaiah thubuai an siamsak a ni.

Champhai District Court-a special judge R Vanlalena chuan police-te thil hmuh chhuah te, thuhretute thusawi leh HM Ronghaka thusawite a zir chian hnuah nimin khan thutlukna a siam a, HM Ronghaka chu kum 10 chhung jail-a táng tur leh Rs. 1,000 chawi turin a hrem a; pawisa hi a chawi loh chuan thla riat dang tàn belh turin a ti bawk.

Court chuan pawngsual tâwktuin dan angin sorkar aṭanga zangnadawmna a dawn theih nan hma la turin Champhai District Legal Service Authority a hriattir nghal a ni.