CM leh minister-te'n pisa an luah ṭan

Mizoram sorkar thar, December 15, Inrinnia lak luh taka chief minister Zoramthanga leh minister dangte chuan nimin khan an pisa ṭheuh an luah ṭan nghal a; pisa luah ṭannaah hian Pathian hnena inhlanna hun an hmang hlawm.

CM Zoramthanga chuan nimin khan Chief Minister's Office (CMO), MacDonald's Hill, Zarkawt chu a luah ṭan a, amah ṭawiawmtute leh CMO-a thawkte'n Pathian hnena lawmthu sawina hun an hmang a; Rev. C Lalsangliana'n hunserh a hmang ni.

Zoramthanga chuan, Pathian leh mipui zara dinhmun pawimawh tak luah theiha a awm chu a lawm thu leh, ram hmasawnna atan theihtawp a chhuah tur thu a sawi a; hmaih awm loa mi tinin ram hmasawnna rah an chan theih nan ngaihtuahna thar nena hmalak a nih tur thu sawiin, chumi tur chuan sorkara thawktute zawng zawng leh mipui ṭawiawmna leh thawhhona a pawimawh thu a sawi bawk.

Deputy chief minister Tawnluia chuan New Secretariat Complex-ah a pisa thar a luah a, pastor Zohmingthanzama’n hunserh a hmang. Tawnluia chuan, Dy.CM dinhmun a luah leh kum 10 hnuah ama office luah ṭhin ngei a luah leh thei chu lawmawm a tih thu sawiin, "Department hrang hranga sorkar hna thawkte nen rawngbawl tláng tur kan ni a, kan rawngbawlsak mipuite hnuai chhiah a, rapbet leh lal hrawt khum mai tur kan ni lo," a ti.

Health minister Dr R Lalthangliana pawhin a pisa a luah ṭan a, Rev.Dr K Lalrinthanga'n hunserh hmangin, Pathian hnena inhlanna hun a hmang. R Lalthangliana chuan, kum 10 hnua ram office pawimawh tak a luah theih chhan chu Pathian vang a nih thu a sawi.

Minister R Lalzirliana'n minister a nih anga a pisa thar a luah ṭannaah Rev. Bialvulmawia'n hunserh a hmang. R Lal­zirliana chuan, hun inher danglam zelah sorkar thara ram hruaitu zingah a tel thei chu lawmawm a tih thu leh, mipui tan theihtawp chhuaha hna thawh ngei a tum thu a sawi a ni.

Agriculture, Cooperation leh Irrigation & Water Resources minister C Lalrinsanga'n a pisa a luah ṭannaahRev.Dr R Lalthanmawia’n Pathian hnena inhlanna hunserh a hmang a; C Lalrinsanga chuan, amah duhsak leh lawmpuina hlan tura kal khawmte chungah lawmthu sawiin, thawhhona leh inpawhna ṭha tak hnuaiah hna thawh a nih ngei a beisei thu a sawi.

Minister of state Lalruatkima pawhin minister pisa a luah ṭan a, a bial chhunga pastor Rev. R Lallianpara'n hunserh a hmang. Lalruatkima chuan, kum tam tak a suangtuah ṭhin a takah a chang ta tih sawiin, "Rorelna dik leh hleih nei lo mipuite'n kan mamawh a, huaisen leh dik taka rorel a pawimawh. Mipui huapzo thei ang bera hna thawh kan tum a ni," a ti.