Central-a kan hruaitute'n a rûkin MNF party an pui - Prof. JV Hluna

Mizoram BJP pre­sident Prof. JV Hluna chuan, Mizoram MLA inthlan neih zawh takah central lama an hruaitute'n a rûkin MNF an puih thu sawiin, "Hetiang hi ni lo se chuan kan party can­didate-te tun ai khan an che ṭha zawk ang," a ti.

New Delhi-a thuthar thehdarhtute'n an kawm­naah Prof. JV Hluna chuan, central lama an party hotute leh MNF-te'n inzawmna an lo nei chuan Mizoram BJP-te dinhmun a tihchhiat phah thu sawiin, "Regional party MNF hnehna chan theih turin kawng a hawnsak ta zawk a ni. Inthlan result-ah pawh kan beisei aiin kan chhe chhia a ni," a ti a, central lama an hruaitu rawn kalte chu inter state border area-ah chauh an campaign thu a sawi.

Mizoram BJP Pre­sident chuan, central-a an hruaitute chu MLA inthlan neih tur atan constituency hrang hranga campaign tura an ngen thu sawiin, "Mahse, Bangladesh leh Tripura border area chauh an ngaih pawimawh a ni. BJP mi leh sa ngeite pawhin an result hi mak an ti a, a tlem berah seat nga chu lak an inbeisei hlawm a ni," a ti.