Hmingchhiatna em em nei loin sorkarna hun kan hmang - Hawla

Mizoram Pradesh Congress Committee (MPCC) chuan nimin khan kumin atana Cong­ress Bhavan khârna hun an hmang a; MPCC president Lal Thanhawla chuan thu sawiin, hming­chhiatna em em nei loin an sorkarna hun an hmang zo niin a sawi.

Lal Thanhawla chuan, sorkarna an chan chhungin anti-incumbency (sor­kar lai ninna) MNF President hmui aṭang lo chuan an hriat loh thu sawiin, "Hmingchhiatna em em nei loa sorkarna kan hmang zo thei hi a lawmawm. Hmasawnna hna kan thawh tamzia chu sawi ngai loin mipuiin an hria a, India rama chanchinbu liante'n Mizoram hmasawnna an chhuah âwl lo a ni," a ti.

MPCC President chuan, BJP-in India ram­ah Congress party khenbeh tumin beihpui an thlak tih sawiin, "Mizoramah pawh keini party chuan hnehna kan chang zo lo. Kan beisei ram kan pha lo a, mahse, lunghnûra ṭhu mai tur kan ni lo," a ti a; khenbehna a awm chuan thawh lehna pawh a awm tur a ni tih chu an thupui tur a nih thu a sawi.

Mizoramah Congress party chu Mizoram tana mamawh chhanna an nih ngar ngar thu sawiin Lal Thanhawla chuan, "Remna leh muanna kan mamawh hun laiin mahni sorkar namthluin remna leh muanna atan sorkarna midang kan kian mai a, kut hnathawktute dinhmun chhe lutuk khaichhuahna tur NLUP kan siam leh. Hetiang ti thei party kan ni hi Pathian hnena lawmthu sawina tham a tling a ni," a ti.

Congress Legislature Party leader Zodintluanga pawhin thu sawiin, Congress party kaihhruai sorkar, kum 10 chhungin hnam rotling hmasawnna tam tak an tihhlawhtlin thu a sawi a, "Tuirial HEP, State Referal Hospital leh MIMER, Horticulture College-te kan din a, sports stadium pawh dis­trict tinah kan dah kim hman tluk a ni," a ti a; MNF chu hmasawnna hna­thawh tur an thawhsak vek tawh thu a sawi.

Congress Bhavan hi January 14, 2019-ah hawn leh a ni ang.