Duhoma'n beidawng lo turin mipui a chah

Zoram Peoples' Movement (ZPM) chuan nimin khan kum 2018 atana ZPM pisa khârna inkhawm an hmang a; ZPM leader Lalduhoma chuan, ZPM mi leh sate leh Mizoram mipuite chu ZPM-in sorkarna la chang rih lo mah se, beidawng mai lo turin a chah.

ZPM pisa khârna inkhawm hi ZPM Steering Committee chairman Lalliansawta’n a kaihruai a; Lalduhoma chuan, inthlanpui neih zawh tâk chungchangah, "A mamawh tak taktute tan an mamawh kan bawhzui thei lo hi a lungchhiatthlak a. Zoram mipuite lo beidawng mai lo turin ka chah duh. Zoram politics-a Pathian ram a lo thlen theihna turin mipuite hian kum nga kan nghah leh a lo ngai ta a. MNF sorkar ni lo, Congress sorkar ni lo, ZPM sorkar ni hek lo, mipui sorkar siam kan duh a ni," a ti.

Lalduhoma chuan, 'Khawsak harsa an tamna hmun a piangah vote an hmu tlem,' tia a sawi chu mi ṭhenkhatin ngai kâwiin, thingtlang mite an mâwl anga sawiah her danglamin an thehdarh tih a sawi a, "Kan sorkar kal tawhte development kalpui dan rêng rêng hi vote tinzâwn vek a ni a, an dawn leh tur aṭangin an ‘cut’ ang tih an hlau a, an retheihna avangin an pumpuiah an kai a, hei hi khaw tinah a thleng," a ti a; chutiang mite chu an sal tânna aṭanga chhuahtir an tum thu a sawi.

ZPM Leader chuan,m Mizo mipui rilru put hmang dik lo tak mai chu - pawisa min petute vote báa inngaihna a ni tih sawiin, "Economics-a kan ziaawm deuhna a piangah ZPM-in vote kan hmu ṭha zel a. Pahnihna kan nihna constituency pakua a awm bawk. Tunah hian meipui kan chhém a, la alh chhuak si lo, khu vut vut ang hi kan ni mek a ni," a ti.

ZPM Steering Committee chair­man Lalliansawta chuan, Mizorama sorkarna siam ta MNF party chu ZPM hmingin lawmpuina a hlan tih a sawi a; rinawmna thutiam an chham ang ngeiin, Mizo mipui chungah thlei bik awm lo, dik tak leh ṭha taka rorel turin an beisei tih a sawi.

Lalliansawta chuan, ZPM-in seat pariat an lak theih nana duhsaktute zawng zawng chungah thinlung takin lawmthu an sawi tih sawiin, "Block leh local steering committee zawng zawng, mahni hna ṭul pawh sawi loa ZPM tana in inpekna kan hrereng a, kan ngaihlu tak meuh a ni," a ti a; chutih rualin, inthlan dawna ṭan an laknaah, ṭawngkam leh chêt danah fel lo a awm a nih chuan ngaidam turin Zoram mipui a ngen a ni.

ZPM pisa khârna inkhawmah hian ZPM MLA tharte hnenah chawi­mawina thuchei hlan a ni a, ZPM star campaigner Vanneihtluanga leh PL Liandinga te chawimawina hlan a ni bawk. ZPM pisa hi January 14, 2019-ah hawn leh a ni ang.