MNF-in Exodus Day an hmang

MNF party chuan nimin khan Mizo Hnam Rûnah Exodus Day leh kumin atana an pisa khârna hun an hmang a; an president Zoramthanga, chief minister chuan thu sawiin, MNF-in beihna tam tak an hmachhawn tawh ṭhinah Pathian remruatna vangin an hneh ṭhin tih a sawi.

Zoramthanga chuan, "MNF hian beihna tam tak kan lo hmachhawn tawh ṭhin a, hun harsa tak tak kan lo tawh tawh. Kan fel bik vang ni hauh loin, 'Pathian leh kan ram tan' kan tih tlatna leh hun hnuhnunga Krista chanchinṭha hril tur chher chhuah kan tum tlatna hi Pathianin kan felnaah min ruatsak a, chu'ngte chu kan hneh leh ṭhin a ni," a ti.

Pathianin Mizo hnam movement a hruai dan chu awihawm loh khawpa mak a nia sawiin Zoramthanga chuan, "Pathianin Mizo hnam movement-a min hruaina hi thawnthu ni ta se, awihawm lo khawpa mak a ni ngei ang. Ral vek theihna hmun aṭangin mak tak maiin min hruai chhuak fo a, thil mak tam tak min tihsak ṭhin," a ti a; Pathianin Mizo hnam tana thil mak tam tak a lo tih tawhte, thil ropui tak tak a lo tihte ngaihtuah a, Pathian hnenah lawmthu sawi ṭhin turin mipui a sáwm.

MNF vice president R Tlanghmingthanga pawhin thu sawiin, "Tun­ah hian Zoram mipui­te'n kan beisei leh kan hmuh duh chu 'change' a ni a, MNF sorkar tharah mipuite'n beiseina thar nen 'change' hmuh duhin min thlir ṭhup a. An mi beisei ang ngei hian 'change' chu kan hmuhtir ngei tur a ni," a ti.

Exodus Day hmanna­ah hian hun harsa leh manganthlak tak kara Mizo hnam movement kengtute chhan chhuah an nih vanga lawmthu sawi nan Pathianin MNF mawhphurhna thar a pek ṭha taka kalpui a nih theih nan an ṭawngṭai rual a ni. Exodus Day hi December 16, 1971-a MNF sipaite East Pa­kis­tan (Bangladesh) a tlâwm a, Arakan pana an inthiar chhuahna kawnga Pathianin a humhim ní denchhena hman ṭhin a ni.

MNF senior vice pre­sident Tawnluia chuan, Mizo Hnam Run chu January 7, 2019 dar 11-ah hawn leh a nih tur thu a puang a ni.