KHAWTHLIR

Session-a tel turin hriattir
Mizoram sorkar chuan thupek chhuahin, vawiina Assembly session neih tur chu chhim vek turin Mizoram sorkara principal secretary, commissioner, secretary leh head of department-te a hriattir a; session chhim turte chu session ṭan hma minute 5 a la awmah an ṭhutna tura ṭhu hman tura beisei an ni.

NE Helpline
India hmarchhak mi, New Delhi khawpuia chengte pual bikin Delhi Police chuan North East Helpline an siam a, healpline no. 1093-ah eng hunah pawh biakpawh theih reng a nih thu sorkar thuchhuah chuan a tarlang. NE Helpline number hi ni tin darkar 24 chhung biak theih a ni a, a betute tan biak man chawi a ngai lo a ni.

Punkhawm khap
Aizawl DC chuan thupek chhuahin, vawiina Assembly session neih tura harsatna a awm lohna atan Aizawl Head Post Office, Treasury Square aṭanga Raj Bhavan gate inkarah vantlang, politics, sakhuana leh thil dang vangin mi panga aia tan punkhawm leh bengchhen a khap. Thupek hian December 20 thleng a huam ang.

PRISM inkhâr
PRISM party chuan nimin khan an pisaah kumin atana an pisa khârna inkhawm an nei a; thu sawitu Vanlalruata, PRISM president chuan, MNF kaihhruai sorkar thar chu an kal dan a fuh loh ṭan nghal niin a sawi. PRISM pisa hi January 14, 2019-ah hawn ṭan leh a ni ang.

NYK-in buatsaih
Nehru Yuva Kendra (NYK), Aizawl chuan nimin khan MZP conference hall-ah 'Partiotism and Nation Building' tih thupui hmangin District Level Declamation Contest an buatsaih a, Aizawl district-a RD block panga aṭangin aiawh an tel. Inelnaa pakhatna chu state level intihsiaknaah a tel dawn a ni. Intihsiaknaah hian Candle Vanrempuii chu pakhatna a ni a, Mary Zonunsangi leh Lalṭanpuii ten an dawt.

CLP hruaitu
Congress Legislature Party (CLP) chuan nimin khan hruaitu an thlang a, leader-ah Zodintluanga, deputy leader-ah C Ngunlianchunga, treasurer-ah Nihar Kanti Chakma, secretary-ah KT Rokhaw leh whip atan Lalrindika Ralte-te an thlang.