Mizoramah pump tam zawk a awm theih nan thawhpuiah mipui sáwm

Public sector oil company hotute chuan December 14, 2018 khan MIZOFED conference room-ah thuthar thehdarhtu ṭhenkhatte an kâwm a; Mizoramah petrol pump (retail outlet) tam zawk a awm theih nan mipui leh press mite thawhpuiah an sáwm.

Indian Oil Corporarion (IOC) chief divisional retail sales manager (CDRSM) Alok D Dutta chuan, ni tin inrêlbâwlna (economy) ṭhang chak tak karah energy mamawhna nasa takin a pun thu a sawi a, "Chutih laiin, public sector undertaking (PSU) oil company - OMC, BPCL, HPCL, IOC-te chuan petrol leh a kaihhnawih hralh chhuah lamah an inzar pharh mek a; tuialhthei ni tina hralh chhuahah hian 4% - 8% in an ṭhang mek a ni," a ti.

Oil company-te chu tuialhthei hralh chhuah kawngah leh mipui mamawh phuhru turin nasa takin hma an la nia sawiin Alok Dutta chuan, "Hmun kilkhâwr zawka awmte'n tuialhthei ṭha man pangngai taka an lei ve theih nante nasa taka hmalak a ni a, hetianga mipui hman tur tlem tlema hralh chhuah hian mi tam tak tan hna thawh tur a siamsak ve a ni," a ti a; oil company-te chuan tuialhthei zawrhna petrol pump din turin advertisement an chhuah mek tih a sawi.

Alok D Dutta sawi danin, MIzorama petrol pump hawn belhna turah dilna leh pump siamtu tur thlannaah sorkarin a awlsam thei ang berin ruahmanna a siam a, online hmanga dilna siam a ni. Dilna chu a awlsam thei ang bera siam a ni a, dilnaa lehkha pawimawh tam tak thil tel ngai ṭhin chu tunah chuan tihbo a ni tawh a, pump siam tura thlante tan chauh document pawimawh thehluh a ngai tawh dawn a ni.

Petrol pump siam turin ram neih a pawimawh a, dil laia ram nei lote pawhin an dil thei a, mahse, thlan an nih chuan ram leh hmun an neih ngei a ngai. A diltu thlan kawngah langtlang taka thil kalpui a ni a, computer-in a thlang chhuak ṭhin dawn a; a zawrhna tur hmunte chu tunlai hmanraw changkang bera thuam a ni ang.

Online lama enfiah duh tan website www.petrolpumpdealerchayan.in ah en theih a ni.