Sipai training-na hmun enfiah a ni CIJWS-ah Covid-19 vei an awm lo

Vairengtea medical team chuan nimin khan Counter Insurgency and Jungle Warfare School (CIJWS), Vairengte hmunhma hrang hrangte an enfiah. CIJWS-ah hian Covid-19 vei rinhlelh mi pathum awm tawh mah se, vei an la awm lo. Nimin vek khan sipai, state pawn aṭanga rawn lut tharte khung hran chungchang Aizawl DC leh sipai hotute'n an sawiho.

Medical team hi Kolasib DC Dr H Lalthlangliana ruahman anga kal an ni a, doctor hoin an thawk chhuak a; Vairengtea CIJWS hmunhma hrang hrang te, Vairengtea an hmun leh Lailapur-a quarantine facility an siamte an endik a ni.

Medical team-te'n Vanglaini palai zawhna chhánga an sawi danin, CIJWS hian Vairengtea an camp-ah leh Lailapur-ah quarantine centre an nei a; chu'ngah chuan chawlh hmang zo, camp-a lut leh tur zawng zawng chu an khung hrang hmasa zel a, a tir lama ni 14 chhung an khung hran ṭhin chu tunah chuan ni 21-ah an ti tam tawh.

Mizoram páwn lam mi chawlh hmang zoa CIJWS-a lut leh tur zawng zawng chu Lailapur-a quarantine centre-ah an dah phawt a, tunah mi 52 an khung hrang mek. Lailapur an thlen veleh uluk taka endik vek a nih bakah, an bungruate chu disinfectant solution hmanga phuh zel a ni a, chumi zawhah quarantine centre atana an hman bahrik (barrack)-ah awmtir an ni.

Lailapur-a CIJWS quarantine centre-a khung hrante chuan chaw eina thlêng, no, bucket, thil dangte a hranpa veka pek an ni a, an chaw eina thlengte chu anmahni'n an sil ṭhin. Pawn lam aṭangin chaw (tiffin) pek an ni a, tiffin pek zawhah a bawmte pawh disinfectant hmanga phuh thianghlim zel a ni. Vairengtea CIJWS camp chhunga quarantine centre chu Vairengte leh Mizoram chhung mi thawk ve, chawlh hmanga lêt lehte khung hran nan hman a ni a; tunah hian mi pasarih (Mizo vek) an awm mek. Quarantine centre-a ni 21 an khung hran hnuah an hna pangngai thawk turin an chhuah chauh ṭhin. CIJWS-ah hian Vairengte mi, camp chhunga awm chilh loa ni tina kal an awm nual bawk a, chu'ng mite chu ni tina kal leh haw an phalsak rih lo a, camp chhungah an riahtir ṭhin a ni. 

CIJWS hotute sawi danin, an mi leh sa zingah Covid-19 vei rinhlelh mi pathum an awm tawh a, chu'ngte chu Masimpur, Assam-a army hospital-ah an dah a, Silchar-ah RT-PCR hmangin an swab sample endik a ni. Mi pathum endik tawhah Covid-19 vei an la awm lo.

CIJWS hmunhma endiktu me­dical team hian Kolasib DC hnenah report an la thehlut dawn a ni. Aizawl DC Vanlalngaihsaka kaihhruai DC Conference Hall-a nimin meeting-ah Border Security Force (BSF), Assam Riffles (AR), Central Reserved Police Force (CRPF) hotute leh medical officer-te an tel. Meeting chuan, state páwn aṭanga sipai chi hrang hrang Mizorama lo lutte chu Mizoram luhká - Vairengte leh Lengpuia sorkar thuneitute hnena an inhriattir bakah, Aizawl DC pisaa assistant commissioner Lalvenhima leh Lalmuanpuii te hnenah an chanchin kimchang - hming, address, an kal kualna (travel history) leh pawimawh dangte whatsapp hmanga hriattir zel turin an ti. Hmai tuam leh social distancing ngai pawimawh leh zual turin an inchah nghal.

BSF, AR leh CRPF hotu ṭheuhte'n quarantine centre-a an inkaihhruai dan leh khung hrante bawlhhlawh an paih dan (waste disposal management)-te an sawi a; sipaia medical officer (doctor)-te'n fimkhur thilah OPD leh damdawi-ina doctor-te an râwn dawna an tih turte an inhrilh bawk.