Indo-Myanmar insumdawn tawnna a nih dan tur taka kalpui turin ngen
lnternational Trade lnitiative Forum (ITIF), Mizoram chuan tun hnai khan Prime Minister hnenah memorandum an thawn a; India leh Myanmar ramri, a bikin Zokhawthar Land Custom Station-a insumdawn tawnna chu a nih dan tur ang taka kalpui thuai turin an ngen.
ITIF tarlan danin, kum 1995-a lndo-Myanmar Border Trade Agreement ziah a nih hnuah India sorkarin kum 1995-ah vêk Moreh, Manipur-ah land customs station a din a, kum 2004-ah Zokhawthar, Mizoramah din a ni bawk.
Mizoramin international border km. 570 neiin, Manipur-in km. 398 a nei thung a; Myanmar nena ramri-ah hun rei tawh tak aṭangin a theih ang angin insumdawn tawnna kalpui a ni. Chumi hnuah, December 2015 aṭangin dan anga insumdawn tawnna (formal trade) kalpui a ni.
ITIF chuan, December 2015 aṭanga formal trade kalpui a nih hnuah Myanmar nena insumdawn tawnna chu nasa takin a tlahniama an hriat thu sawiin, "Hei hian hmarchhak state-te economic lama hmasawnna tur a tiṭhanṭhu a, a bik takin Mizoramin a tuar zual hle. Chu bakah, dan loa a rûka bungraw lak luh a tam a, sorkarin chhiah a hmuh tur tam tak a hloh bawk a ni," an ti.
Ramri kaltlanga dan loa thil tawlh rûk zingah ralthuam leh ruihhlo a tam thu tarlangin ITIF chuan, "Hei hi ram himna khawih pawi thei a ni," an ti a; dan loa bungraw tawlh rûkte chu formal trade kalpui chung sia a nih tur anga tihpuitlin si loh vang nia an hriat thu an tarlang.
ITIF, Mizoram chuan, Indo-Myanmar border trade chu India sorkarin ngai pawimawh lehzual se, dan anga a nih dan tur ang taka a kal theih nan hmalak ni se an duh thu an tarlang a, "Government of India hian ram pum bakah, a bik takin Mizoramin a hlâwkna a tèl theih nan dan anga ramria insumdawn tawnna hi a tihchangtlun a ṭul a ni," an ti.
lndo-Myanmar border trade dinhmun chu pawl ṭhenkhatin an zir chiang tawh tih sawiin, zir chiangtu zinga pakhatin rawtna an neih, lndo-Myanmar border trade a nih dan tur ang taka kalpui chu bawhzui lohin hun rei tak a awm thu an tarlang a; hun khawhral zel tawh loin ramria insumdawn tawnna chu a nih dan tur ang taka kalpui thuai a ṭul thu an sawi a ni.