Kawngpuite a ṭha ta viau mai hi thawktu a awm a ni - Zoramthanga

Chief minister Zoramthanga, MNF president ni bawk chuan, Mizorama kawngpuite a ṭha ta viau chu thawktu an awm vang a nih thu a sawi.

Zoramthanga hian nimin khan Lungleia Mizo Hnam Rûnah thu sawiin, "Aizawl-Thenzawl-Lunglei road hi a lo ṭhat tâk êm avangin kan tum aia darkar khat vela hmain kan lo thleng a, kan kawngpuite a lo ṭha chho ta viau mai hi thawktu chu a awm a ni," a ti.

MNF President chuan, Lunglei khawthlang lama by-pass road, cheng vaibelchhe 300 chuang sènna tur chu department-in detailed project report an peih tawh tih sawiin, "Tunah chuan Delhi lamah kan theh thla tawh a, kan hotuten Ministry of Road Transport-ah nawr chhuah dan tur an buaipui mek," a ti a; MNF sorkar hnuaiah Lungleiin hmél thar a hmu zel dawn tih a sawi.

Lunglei khawpuiin hmasawnna lamah chak zawka ke a pên theih nan Municipal Council siam a ni a, inthlan pawh a hnai tawh nia sawiin Zoramthanga chuan, "Kan hotute'n candidate an ruahman ang a, candidate chan loh emaw, kan duh zawng mi candidate awm loh avanga tliah hnâwpte hi a tlo lo tih hria i la. He party-in kum 60 a tlin theihna tura beitute hi an tliak hnâwp ngai lo a, an tlo hle a ni," a ti.