Mizoramah Hriselna Kûtpui hman a ni
Ministry of Health and Family Welfare-in a ruahman angin, India Independence vawi 75-na lawmna, Azadi ka Amrit Mahotsav pualin nimin khan India ramah Hriselna Kûtpui (Health Mela) hman a ni a; Mizoramah pawh Rural Development (RD) block hrang hrangah hman a ni.
Mela hi department hrang hrang - Health & Family Welfare, School Education, IPR, Women and Child Development, Rural Development, Sports & Youth Affairs, Urban Development and Poverty Alleviation leh Art & Culture department-te bakah, National Health Mission, AYUSH leh Food Safety-te thawkhoin an buatsaih a ni a, April 29, 2022 thleng a awh ang.
Health minister Dr R Lalthangliana chuan Aibawk RD Block tana Sialsuka Hriselna Kutpui buatsaih a hawng a, "Mizorama chengte hi mahni taksa hriselna tun aia uluk zawka inchîk mamawh kan ni," tiin, Mela chu chhawr ṭangkai turin mipui a chah.
Health Minister chuan Sialsuk damdawi-in thar, cheng nuai 200 hmanga sak mek chu zawh thuai a nih tur thu a sawi a; Lamchhip, Samlukhai leh Sumsuiha health sub-centre-te chu health & wellness centre-ah hlànkai a nih thu te, Mizorama sub-centre leh PHC zawng zawng chu health & wellness centre-ah hlankai vek a nih tur thute a sawi bawk.
Lok Sabha MP C Lalrosanga chuan Sihphir Multipurpose Hall-ah Tlangnuam RD Block Hriselna Kûtpui a hawng a ni. Health Mela-ah hian damlo inentirte tan damdawi-ina an health record hrang hrang an dahṭhatna tur Health ID (ABHA ID) leh healthcare hnuaia health insurance card (Ayushman Bharat PM-JAY Card) siamsak a ni. Zunthlum, BP sang, ka chhung, hnute leh chhûl cancer-te test nghal theih a ni a; medicine, surgery, ENT, eye, dental, obs & gynae, paediatrics specialist doctor-te'n clinic neiin, a thlawnin damlo an en dawn a, a ṭul angin investigation leh a thlawna damdawi sem a ni.
Taksa hriselna atana thil pawimawh chi hrang hrangte zirtirna hun hman a nih bakah, taksa sawizawina hun hman a ni a; health program hrang hrang - nu leh naute hriselna, indanna, HIV/AIDS, zûk leh hmuam leh ruihhlo tihrehna tur, cancer programme, leprosy, TB, malaria leh vun natna, mit (eye) leh a dangte inzirtirna sem a ni bawk.