Chief Minister chhui tura ngenna Lokayukta-in a zir chiang ṭan mek

Mizoram First Movement (MFM)-in Lengpui Airport tih­changtlunnaah dan bawhchhiat­na awm ngeia an ngaih avanga chief minister Zoramthanga chhui chiang tura an ngenna chu Lokayukta-in an zir chiang mek.

Vanglaini thu dawn danin, MFM-in Chief Minister chhui chiang tura ngenna April 11, 2022-a an thehluh hnu lawkah sorkar chawlh a tam avangin Lokayukta chuan zir chian hna an thawk chak thei lo a, vawiin aṭang hian ngawrh zawkin zir chian an tum a ni.

Lokayukta hian complaint lut an zir chian hnuah PWD hnenah Chief Minister puh a nihna an zâwt chiang dawn a; chumi azir chuan chhui zui zel tur a nih leh nih lohah Lokayukta chuan thutlukna a siam ang.

Chhui zui tlaka a ngai a nih chuan Lokayukta chuan Anti Corruption Bureau (ACB) emaw, Central Bureau of Investigation (CBI) emaw chhuitir turin thutlukna a siam dawn. Lokayukta hian Investigation Wing a la neih loh avangin agency dang a chhùitir a la ngai a ni.

Hetih lai hian, ACB chhùi tura pek a nih chuan ACB chuan Vigilance department-ah chhùi phalna a lâk leh phawt a ngai dawn a, CBI pawhin state sorkarah chhùi phalna a lâk a ngai bawk.

Lokayukta aṭanga thu dawn danin, Vigilance department chuan Lokayukta-in ACB hnena chhui tura an tih, ACB-in chhùi phalna an dilah phalsak loh an la nei lo. CBI chhui tura an tihah erawh chuan Mizoram sorkarin chhùi phalna a la pe lo thung.

MFM hian Lengpui Airport tihchangtlun hna (contract) inpek chungchangah dan bawh­chhiatna awm ngei nia hriain Lokayukta-ah a zualko a, a mawh­phurtu Chief Minister chu finance leh audit lama mi thiamte chhùi chiantir ngei turin an ngen a ni.

MFM chuan, PWD changtu Zoramthanga chu a thuneihna hmang khawlo leh chhungkhat laina duhsak uchuakah puhin, "India danpui Article 14 a bawhchhiat avang te, General Financial Rules (GFR) 2017-a rule 162-na leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei tura ngenna Lokayukta-ah kan thlen a ni," an ti.