Mithiamte thinlungah ram siam duhna a lian tawh - ZPM President

ZPM president Lal­lian­sawta chuan nimin khan an party pisaah thu sawiin, Mizo mithiamte thinlungah ram siam duhna tak tak a lian tawh hlea a hriat thu a sawi.

Lalliansawta chuan, "Kan ram leh hnam tana mi thiam leh hmingṭha tak takte'n ZPM an rawn zawm hian chhan bulfûk tak a neiin ka hria, kan mithiamte thinlungah ram siam duhna tak tak a len tawhzia a tarlang chiang hle a ni," a ti.

ZPM thuchhuah tarlan danin, Mizoram University-a Exten­sion Education & Rural Development depart­ment-a HoD Prof. Lalni­lawma chu ZPM-ah Lal­liansawta'n a lawm lut a ni. Prof. Lalni­lawma chuan, "ZPM hi hmasawnna tluantling min neihtir theitu tur party nia ka rin avang te, retheihna ata Zoram khai chhuak theitu tur nia ka rin avang te, mipui sorkar dik tak siam theitu tur nia ka rin avang te, zirchianna (research) hmangin thil a kalpui dawn nia ka rin avang te, party mi leh mi lo thliar loa mipui sorkar a nih angin ṭanpuina mamawh apiang a ṭanpui mai dawna ka rin avang tea zawm ta ka ni,” tiin a sawi.