KHAWTHLIR
Book of the Year Tha zual pathum
Mizo Academy of Letters chuan Book of the Year 2021 a thlanna kal mekah nimin khan a ṭha zual pathumte an tarlang a, chu'ngte chu - Lalhruaitluanga Chawngte ziah 'Hnam ropuite u tho ru le' tih te, Lalhmingchhuanga Zongte ziah 'Mizo buanpuite' tih leh, Darchuailova Renthlei ziah 'Vankhama thulehthliah thiam' tihte a ni. Top-3 aṭang hian Book of the Year thlan a ni ang.
Lehkhabu tlangzarh
Prof. VP Sati, Department of Geography & Resource Management, Mizoram University lehkhabu ziah, 'Mizoram - Land and People' tih chu nimin chhun khan MJA president C Lalrambuatsaiha'n Aizawl Press Club-ah a tlangzarh. Lehkhabu hi Mizoram leilung leh environment, Mizote hnam nunphung, lo neih dan, ranvulh lam leh thil dang chi hrang hrang ziahna a ni.
MHIP Rûn hawng
Aizawl West-III bialtu MLA VL Zaithanzama chuan nimin khan a bial chhunga Mission Vengthlang MHIP Rûn sak thar a hawng. MHIP Rûn hi chhawng thum a ni a, bialtu MLA VL Zaithanzama bakah, MP hlui Vanlalzawma leh Ronald Sapa Tlau leh, bialtu councillor hlui Lalhmingmawia te'n an fund an pek hmanga sak a ni.
Khuahkhirhna sût
Food, Civil Supplies & Consumers Affairs department-in lirthei pakhat tan ṭum khata petrol/diesel lak theih zat khuahkhirhna April 5, 2022-a a tihchhuah chu April 13, 2022 khan a sût. Mizoram IOCL Tranporters Forum-in tuialhthei/POL an phur chhunzawm leh tawh a, petrol leh diesel pawh pangngai taka retail outlet (petrol pump)-te'n an neih leh tawh avangin khuahkhirhna hi sût a ni.
Minister-in enfiah
Health minister Dr R Lalthangliana chuan nimin khan Zoram Medical College (ZMC)-a hmasawnna ruhrel thawh mekte a enfiah. Minister hi Health secretary R Lalramnghaka, HFW principal director Dr F Lallianhlira leh mi pawimawh dangte'n an ṭawiawm a ni.