Mizoramah BJP lo chu sorkar tur an awm lo - BJP President

BJP, Mizoram Pradesh president Vanlalhmuaka chuan, mahni tih theih loh tur intiam ṭhinte laka invéng fimkhur turin Mizoram mipui a chah a; Mizoramah BJP lo chu sorkar tur an awm lo niin a sawi.

Mizoram BJP President hian an party pisaa nimina inkhawmah thu sawiin, "Sorkar kan hrawn tawh leh sorkar mek party-te bakah, party dangte'n an tih theih loh tur hmanga mipui min bumna tur laka invéng ṭheuh turin Mizoram mipui ka sawm che u a ni," a ti.

Vanlalhmuaka chuan, Mizoramah BJP lo chu sorkar tur an awm lo nia sawiin, "Mizoram mipui rin ngam tur keini lo chu an awm lo a ni tih a chiang. 'Sabka sath sabka ka vikas' (Mi tinin an chan vo an chang vek tur a ni) tih hi kan thupui a ni reng," a ti a; Mizoram mipuiin sorkar aṭangin an chanvo an chang ṭhin em tih an inzawh a ngaih thu a sawi.

BJP President chuan, state dangte hmasawnna awh ringawt tur a ni lo tih sawiin, "Mizoram hian state dangte hmasawnna neih ang hi kan nei thei a ni," a ti a; hmarchhakah BJP sorkarna a ding vek tawh nia sawiin, "Mizoramah hian BJP sorkar hi kan mamawh chu a ni a, BJP sorkar siam tur chuan Congress, MNF, ZPM leh PC party-te'n party-a an luh chhan leh an din chhan chu Mizoramah hmasawnna thlentir a nih avangin BJP min la zawm vek ka ring," a ti bawk.