Phairuangkai lei thawm ṭhat mek enfiah

NH-302 Monitoring Committee for Tlabung hruaitute chuan nimin khan Phairuangkai lei thawm ṭhat hna thawh mek leh Tlabung-Lunglei inkar kawng siam mekte an enfiah a; ṭha lehzual leh uluk lehzuala hna thawk turin an ngen.

Phairuangkai lei siamṭhat hna chu NH-302 kawngpui sial hna thawktu NHIDCL hnuaia SRK Constructions kutah dah a ni a; SRK Constructions hotute chuan, April 13, 2022-ah lei zapui pakhat a chhe leh tih sawiin, an thawm ṭha mek a, hmanraw mamawh a la thlen loh avangin hna an la zo thei lo tih an sawi.

NH-302 Monitoring Committee chuan, Phairuangkai lei chu chawhrualin ni tin lirthei 200 chuangin an zawh ziah ang a ni tih sawiin, "Lunglei district khawthlang lam mipui zawng zawng tan a pawimawh em em a, lei thar siam tumin ruahmanna awm mek mah se, hun rei tak kan rin a la ṭul dawn avangin a enkawltute thawm ṭhat hna leh en zui hna uluk taka kalpui turin kan ngen a ni," an ti.

Monitoring Committee chuan chuan NH-302 kawngpui siam mek pawh an enfiah a, kawng siamtu SRK Construction-in thla khat aia rei hna an thawk mumal tawh lo tih sawiin, "Hna thawh hun chhung an neih thla 18-ah thla ruk dawn a ral tawh a, hnathawh hmasawnna erawh a tlem hle," an ti a, nimina an tlawh lai pawhin hna thawk hmuh tur an awm lo tih an sawi.

Committee for Tlabung chuan, SRK Constructions-in rawra an herna hmun pakhat an tlawh bawk a, "Hman tura an chhêk khâwl lung hi kawng siamna atana ṭha tak niin kan hre lo a, thuneitute'n en chiang a, quality check nei turin kan ngen a ni," an ti.