CM phuahchawp thil pahnih a awm - K Lalsawmvela

Adviser to Chief Minister (Technical) K Lalsawmvela chuan, tun hmaa la awm ngai lo, chief minister Zoramthanga phuahchawp thil pahnih - bamboo link road leh Aizawl by-pass road-te a awm thar thu a sawi.

K Lalsawmvela hian nimin khan Mizo Hnam Rûna inkhawmah thu sawiin, "Bamboo link road hi kan pu phuahchawp a ni a, peace bonus hming phuahchawp nen khan a inang chiah. Phuahchawp rau rauah a tak taka pawisa awm a ni," a ti.

Bamboo link road chu Chief Minister tumruhna leh hrât lâk vanga hlawhtling mek a nia sawiin K Lalsawmvela chuan, Union budget-ah Mizoram tan cheng vbc. 100 dah a nih thu leh, chu chu tun hmaa peace bonus nen a inan chiah thu a sawi.

CM Technical Adviser sawi danin, bamboo link road atan concept paper-ah cheng vbc. 965 ruahman a ni a, mahse, sorkar laipuia Finance Ministry-in pilot project atan vbc. 100 a pe a ni. Pilot project a nih angin ministry lamin an enfiah vek dawn a, hmun hrang hranga sem darh loin hmun pahnihah Lengpui-West Serzawl leh Tuirial Airfield - Hmar Chaltlang lamah kalpui tur a ni.

Aizawl by-pass road project chi hnih a awm a, pakhat chu union budget-a cheng vbc. 500 lang, Sihhmui - MZU hnuai - Lawipu hnuai - Tlangnuam - Hlimen - Samtlang - Hualngohmun leh Melriat inkar kawng sial tur a ni a, km. 40 vela thui, double lane tur niin, lei lian (major bridge) pathum a awm dawn. Hemi atan hian DPR siam mek a ni.

Aizawl by-pass road dang leh chu, Sairang Kurung lui aṭanga Tuirial Airfield inkar kawng thar, km. 28.9-a thui sial tur a ni. Kawng thar sial chu Rangvamual epah chhoin, Bawngkawn Brigade aṭanga Muthi rama chhuak turin lei verh tum a ni a, lei verh chu km. 2.40-a tui tura ngaih a ni. Kawng siamtu tur chu NHIDCL an ni a, a siamna atan cheng vbc. 715 vel hû DPR siam mek a ni.

K Lalsawmvela chuan, Bawngkawn leh Vaivakawnah flyover bridge siam turin feasibility report pawm a ni tawh tih sawiin, "TCIL company nen MoU ziah a ni dawn a, Law department Vet (pawmpui) ngaite nghah mek a ni," a ti.

PWD hnuaia contractor hna chungchang sawiin Adviser to CM chuan, "Fund lo kalna azirin PWD hnuaia contractor registered nih kher a ngai lo. Kan kawng siamtu hna thawktu hnam dang company-te pawh hi registered contractor pakhat mah an awm lo," a ti bawk.