Mizoramah Covid-19 vei Mi 201 an tling tawh
Mizoramah nimin thleng khan Covid-19 hripui vei mi 201 hmuh chhuah a ni tawh. Hripui vei zinga mi 143 chu an vei tawh loh avangin chhuahtir an ni tawh a, vei mek mi 58 an awm.
July 7, Thawhlehnia Zoram Medical College (ZMC) Covid-19 laboratory-ah swab sample 115 endikah Covid-19 vei mi pakhat hmuh chhuah a ni a, Kolasib district mi, tun hnaia ram dang aṭanga rawn haw a ni. ZMC-ah hian nimin khan sample 300 chuang endik leh a ni a, result kan hre hman lo.
Nimin khan Lunglei Civil Hospital laboratory-ah TrueNAT kháwl hmanga mi 19-te swab sample endik aṭangin Covid-19 vei mi pathum hmuh chhuah a ni bawk a; 60 Bn BSF mi leh sa, mipa vek niin, kum 50-58 inkar an ni a, Jammu & Kashmir, West Bengal leh Uttar Pradesh aṭanga July 1, 2020-a Lungleia thlengte niin, JNV, Pukpuia khung hran mek an nih thu sorkar thuchhuah chuan a tarlang.
Lungleia hripui vei hmuh tharte hian mipui (civil mi) tlawhpawh an nei lo a, tun dinhmunah harsatna (symptom) an nei lo a, Dedicated Covid Health Centre (DCHC) - SIRD, Pûkpuiah dah luh nghal an ni. Hetih lai hian, nimin khan Covid-19 vei dam tawh mi pali, hmeichhia vekte chu State Referral Hospital (SRH) aṭangin chhuahtir an ni a; Aizawl district mi pathum leh Lunglei district mi pakhat an ni. Heti hian Mizoramah Covid-19 vei mi 201 hmuh chhuah a ni tawh a, chu'ng zinga 143 (71.44%) chu dam takin an chhuak tawh a, vei mek mi 58 (28.86%) an la awm thung.