World Heritage Day hman a ni

Tourism department leh Zoram Research Foundation huaihawtin nimin khan Tourism directorate pisaah World Heritage Day hman a ni a, thupui chu 'Heritage and climate' tih a ni.

Thil hlui vawnhim leh humhalh a ṭulzia inzirtirna ní, World Heritage Day hmannaah hian Tourism director V Lalengmawia chuan, "Mizoram hi ram pumah khualzin rintlak ni tura hmalakna atana Responsible Tourism Policy nei hmasa ber kan ni," a ti.

V Lalengmawia chuan, tourism chungchanga ngaihtuahna thar pe zel ṭhintu chu mipui an nih thu te, social media an hman ṭangkai thu te, village/rural tourism mumal leh kawnghmang nei zawka uar zel a ṭul thu te, ram dang aṭanga rawn kalte ei tlakin ei leh in siam uluk a ṭul thu te, hnam zia pho lang thei hnam incheinate uluk a ṭul thute a sawi bawk.

World Heritage Day hmannaah hian Mizoram University, Pachhunga University College, Govt. Aizawl College, Johnson College, Aizawl West College leh ICFAI University aṭangin zirtirtu leh zirlai ṭhahnem tak an tel a ni.