Siaha district-ah hripui vei an awm tawh lo

April 17, Pathianni khan Mizoramah Covid-19 vei mi 61 hmuh chhuah a ni a, positivity rate sang lehin, 35.26% a tling. Nimin khan hripui vei dam tawh mi 129 chhuahtir an ni a, Covid-19 vei thi an awm lo. Siaha district-ah hripui vei an awm tawh rih lo a ni.

Pathiannia hripui vei hmuh thar mi 61-te chu mipa 21 leh hmeichhia 40 an ni a, RAT hmanga hmuh vek an ni. RT-PCR leh FIA hmangin swab sample endik a ni lo a, TrueNAT hmanga sample pahnih endikte an negative ve ve bawk. April 11, 2022 aṭangin RT-PCR hmangin Covid-19 positive hmuh a ni tawh lo.

Nimin tlai dar 5 dinhmun angin, Mizoramah Covid-19 vei inenkawl lai mi 460 chiah an awm tawh a, kum khat chuang hnua active case a tlem ber hun a thleng mek. Siaha district-ah hripui vei an awm tawh rih lo a, Lawngtlai, Kolasib, Hnahthial leh Champhai district-ah mi 10 aia tlem vek an awm tawh laiin, Saitual district-ah mi 147 an la awm thung.

IDSP record angin, Mizoramah Covid-19 vei 2,26,172 hmuh chhuah a ni tawh a, mipa 1,05,379 leh hmeichhia 1,20,793 an ni a, mipa aiin hmeichhia 15,414-in an tam zawk. Nimin tlai dar 5 thleng khan mi 2,25,020 (99.49%) chhuahtir an ni tawh a, mi 692 (0.31%) thi tawhin, enkawl mek mi 460 (0.20%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,172 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.