Assembly Session neih ṭan a ni Speaker - Lalrinliana Sailo

Mizoram Legislative Assembly pariatna session hmasa ber chu nimin khan Assembly House-ah ṭan a ni a vawiin leh naktukah chhunzawm a ni ang. House-ah hian Assembly speaker atan Chalfilh bial aṭanga MNF ticket-a thlan tlin Lalrinliana Sailo thlan a nih bakah, MLA thlan tlin tharte lak luhna hun hman a ni.

Assembly session hi pro-tem speaker Lalrinawma’n a kaihruai a, MLA atana thlan tharte lak luhna hun a hman zawhah Speaker tur thlanna hun hman a ni.

Chalfilh bialtu MLA Lalrinliana Sailo chu chuhtu awm loin speaker atan thlan a nih thu a puang a; Speaker thar chu House leader Zoramthanga, opposition leader Lalduhoma leh Congress Legislature Party leader Zodintluanga ten Speaker ṭhutnaah an hruai a, speaker ṭhutna a luah nghal.

8th. Mizoram Legis­lative Assembly spea­ker atan hian MNF Legislature Party secre­tary Lalruatkima'n Lal­rinliana Sailo a rawt a, a rawtna chu December 17, Thawhṭanni khan Assembly secretary SR Zokhuma hnenah a thehlut a; MNF MLA dang Lalchamliana'n a thlawp a ni.

Lalrinliana Sailo chuan, Assembly House-a member-te khawsak danin ram zahawmna a hril thui hle tih a sawi a, MLA-te chu Mizoram Legislative Assembly rorelna-in zahawmna vawng nung zel turin a sáwm, "Mem­ber-te'n zawhna zawt turin dikna chanvo in nei ngei a, mahse ram leh hnam tan pawimawh a ni em, tih ngaihtuah ang u," a ti.

Chief minister Zoram­thanga, House leader pawhin India rama Le­gis­lative Assembly House hrang hrangte nen tehkhinin, Mizoram chu entawntlak pawl tak a nih thu a sawi a; rorelna-in zahawm tak leh rorelna sâwt taka kalpui a nih theih nan thawhpuiah leh ṭanrualpuiah MLA-te a sawm a ni.

Hmun tam takah chuan House-ah member-te'n buaina an siam ṭhin thu sawiin Zoramthanga chuan, "Parliament-ah phei chuan rorel theih lohtein buaina a awm ṭhin. Mizoramah chuan rorel theih loh a awm ngai lo a, thianghlim taka House proceeding kan kalpui ṭhin hi chhunzawm zel chi a ni. Mawi lo taka chet hian hlawkna a awm lo," a ti.

House Leader chuan member zahawmna humhim turin theihtawp an chhuah tur thu sawiin, member-te chu an zah­awmna kengkawh tura theihtawp an chhuahve a beisei thu a hrilh. ZPM Legislature Party leader Lalduoma pawhin thu sawiin tun hmain Speaker rorel dan­ah hmuh nuam lo tak tak a thleng ṭhin thu sawiin, "Speaker thar chuan lai takin ro min relpui ka ring," a ti a, Kristianna nunze mawi nen House a kal theih a beisei thu a sawi.

Lalduhoma chuan ZPM MLA-te chu Pathianin House-a a dah ang ngeiin constructive opposition an ni dawn tih sawiin, "Thil ṭhaah chuan sorkar theih­tawpin kan pui ang a, dodal ngaiah erawh chuan khauh takin kan dodal dawn," a ti.

Thusawitu dang, Congress Legislature Party leader Zodintluanga chuan Speaker thar duhsakna hlanin, "Roreltute pawh kan ram tana ṭha turah chuan theihtawpin kan thlawp dawn, kan ram tana ṭha lo turah chuan huai takin kan dodal thung ang," a ti a, House member-te chu kum 5 chhunga ram tana theihtawp chhuahpuiah a sawm.

BJP member Dr. BD Chakma pawhin thu sawiin, "Central-a sorkar BJP MLA ka nih angin, central dawr tura sorkar puih a ngaihnaah chuan engtik lai pawhin ka inhuam reng," a ti. Assembly session hi vawiinah chhunzawm a ni dawn a, vawiina ṭan a nih veleh Governor Kummanam Rajasekharan-a'n thu a sawi dawn. Governor thusawite chu naktûkah sawiho a ni ang. Naktukah vek hian session hnuhnung ber leh tun session inkara MP leh MLA thite sûnna hun hman a ni dawn a; Mizoram MLA a nih laia thi S Laldingliana sûn a ni ang.