Duhoma'n West-I a chhuahsan dawn
Mizoram Legislative Assembly inthlanpui neih zawh taka constituency pahniha tling awm chhun Lalduhoma chuan Serchhip bial luahin a enkawl zui dawn a, Aizawl West-I bial a chhuahsan dawn.
ZPM leader Lalduhoma hi Mizoram inthlanpuiah khan 15-Aizawl West-I leh 26-Serchhip constituency-ahte ding kawpin, a tling ve ve.
Mizoram Legislative Assembly inkaihhruaina danah, inthlan result official-a puan a nih aṭanga ni 10 chhungin a luah (retain) zui zawk tur leh a chhuahsan tur tihchian a ngaih avangin, result puan ni aṭanga a ni riatna, nimin khan a chhuahsan tur zawk an tichiang ta a ni.
ZPM thuchhuah chuan, Lalduhoma'n bial a chhuahsan tur zawk chungchangah a tlinna bial pahniha ZPM Block hruaitute an inráwn tih sawiin, ZPM general headquarters chu chingfel tura an tih angin, ZPM Caucus member-te December 17, 2018-a ṭhukhawmin thutlulna an siam tih a tarlang a; "Zoram politics kal zel dan turte ngun taka ngaihtuahin, ZPM official candidate Lalduhoma, Assembly constituency pahnih - Aizawl West-I leh Serchhip-a thlan tlin hian, Serchhip zawk hi luah zui rawh se, tiin thutlukna an siam a ni," an ti.
ZPM chuan, duhsak taka Lalduhoma thlang tlingtu Aizawl West-I mipui zawng zawng hnenah inthlahrung tak chungin hriatthiamna sang ber an ngên tih an tarlang.