December 21 - January 14, 2019 chhung sorkarin dry day a puang

Council of Ministers chu nimin khan chief minister Zoramthanga hoin Cabinet Room-ah an ṭhukhawm a; December 21, 2018 aṭanga January 14, 2019 thleng zu zawrh phal loh ní, dry day atan an puang.

Council of Ministers thutlukna hi nimin khan Chief Minister-in a pisa-ah a puang nghal a; December 21, 2018 aṭanga January 14, 2019 chhung dry day atan puan a nih thu sawiin, "Sorkar thutlukna a ni. Kan policy kenkawhna atan ṭul kan ti. A ṭul dang zel chu sorkain kan ûm zui ang," a ti.

Zoramthanga chuan, nimin aṭang khan sorkar agency ṭhenkhat (police, MIFCO)-te zu zawrhtir chu tihtawp nghal vek a nih thu sawiin, "Sorkarin a zawrh ni lo, mimalin a zawrh a tam zawk a, tunah chuan páwng khap ngawt theih a ni lo," a ti a; mimalin zu an zawrh titawp tur chuan dan siam a, Assembly session-ah pass a la ngaih tur thu a sawi.

Vanglaini palai zawhna chhangin Chief Minister chuan, Assembly session hmasa berah MLPC Act tihtawpna atana dan siam put luh hman an tum thu a sawi a, "Tunah chuan Krismas dawn a ni a, dan siam zung zung theih a ni lo. Zu khap tura kan hma­laknaah hian, kohhran, tlawm­ngai pawl leh mipuite thlàwpna kan ngen a ni," a ti.

Thuthar thehdarhtute a kawmnaah hian Chief Minister hi Excise & Nar­cotics minister Dr. K Beichhua, I&PR minister Lal­ruatkima leh Excise & Narcotics dept. official-te'n an ṭawiawm.