Police-in hnu chhui nan CCTV an hmang ṭangkai

Mizoram Police-in Aizawl khawpuia closed-circuit television (CCTV) an bunte kum 2015 aṭanga hman a nih hnuah misual, pawikhawih chíngte man chhuahna atan vawi eng emaw zat hman ṭangkai a ni tawh a; thihna thlen chhan chhui chhuah nan te, ATM rawk, rûkrûk, motor insû, motor bo man chhuahna leh thil dangahte CCTV a ṭangkai hle hle tih an sawi.

Aizawla CCTV hi Aizawl SP pisaah a hmunpui awmin, darkar 24 chhung vil a ni a, police-a FIR lut leh emergency case-te an ensak ṭhin. Thawktute chuan, Aizawla CCTV dah a nih vang hian thil sual titute an tawmim phaha an hriat thu an sawi.

CCTV enkawltute chhinchhiah danin, tun hnaia Vaivakawna intibuai, kut thlaktute an tlan bona, a hnua kut tuartu a thihnaah CCTV chu ṭangkai taka hman a ni a; CCTV footage ngun taka an en aṭangin misualte chu police-in an man theih phah a ni.

ATM rawk man chhuahna atan pawh a ṭangkai hle a, ATM chhunga lut mi pakhat chuan CCTV a awm tih an hriat avangin a hmai tuam mah se, kawta a motor ding an chhui zuina aṭangin man chhuah a ni. Zo­nuama motor bo pakhat chu Aizawl khawpuiah nasa taka ûm zui ni mah se, man hman a ni lo a; CCTV hmanga an chhui zuinaah wheelcap aṭangin an hre chhuak a, Silchar-ah a tlan tih an hriat avangin an ûm zui a, an man leh phah a ni. CCTV vang hian thil rûk chíng man chhuah eng emaw zat an nei tawh bawk.

CCTV enkawltute chuan, Police-ah FIR thehlut an awmin CCTV aṭangin an ensak ṭhin a, "Darkar 2/3 te kan endiksak cháng a awm a, an thil tihbo leh thil thlen hun darkar rawn sawi mah se, chiang taka ensak a ngaih avangin kan en rei ṭhin," an ti a; Krismas dawn a nih avangin Bazarpui leh Power House phei vel chu an en nasat zual thu an sawi.

CCTV an hman mekin automatic number plate recognition a neih loh avangin lirthei dan bawhchhe man kawngah duhthu a sâm tawk lo tih an sawi a, "CCTV hi scientific evidence a ni a, Court thleng pawha pawm a nih avangin conviction siam theihna a ni," an ti.

Police station lock-up-ah CCTV an dah chhan chu, mahni intihhlum tum an awm palha vênna tur a ni tih sawiin, "Custodial death hi a serious hle a, hna aṭanga bân theih hialna a ni. Lock-up zawng zawngah kan dah vek a, hei hian lock-up chhunga intihhlum tum an awmin a veng hle a ni," an ti a; law & order chungchangah harsatna a awmin CCTV a ṭangkai hle tih an sawi bawk.

Aizawl khawpuia CCTV bun hi kum 2015-ah bul ṭan a ni a, Aizawl SP office-ah control room dah a ni. Kulikawn aṭanga Ṭhuampui thleng, khawpui chhung hmun lûn lai 43-ah camera dah a ni a, camera an dah zawng zawng chu 186 a ni. A bun hna hi hlawm hrang hrangah ṭhen a ni a, November 11, 2016 khan a thawh thumna an zo tawh.

CCTV-in a lak phak china thil thlengte chu darkar 24 record a ni a, ni 30 chhung en lêt theih a ni. A enkawl tur hian Deputy SP kaihhruaina hnuaiah thawktu mi 10 an awm. Kum 2015-2017 chhung khan police station-ah FIR lut an lo ensak tawh a; Aizawl PS-ah 128, Bawngkawn PS-ah 42, Vaivakawn PS-ah 20, Kulikawn PS-ah 21 leh Traffic PS-ah panga, a vaiin FIR 276 an ensak tawh a ni.