Ka sawi lo - Prof. JV Hluna

BJP Mizoram Pradesh chuan thuchhuah siamin, December 18, Thawhlehnia chhuak Vanglaini-ah BJP president Prof. JV Hluna'n 'Central-a kan hruaitute'n a rûkin MNF party an pui,' tih thu a sawi anga tarlan chu a dik lo niin an tarlang a; MNF sorkar chu BJP sorkar tlukin an lawm tih an sawi bawk.

BJP thuchhuah chuan, December 12, 2018 khan an President chu Delhi-ah a kal tih sawiin, December 13-14 chhung­in party meeting an nei tih a tarlang a; 'MNF party-te nena thawhhona ṭha tak kan neih theih dan tur kan sawiho zawk a ni. December 15-ah khan ka lo haw leh a ni. Chuvangin, ka zin chhung hian press mite tumah ka hmu lo,' tiin a sawi niin an tarlang a ni.

MNF leh BJP-te chu NEDA-ah an thawkho tih sawiin BJP chuan, "He laia MNF sorkar pawh hi kan sorkar tlukin kan lâwm a ni. Hemi chungchangah hian Central-a kan hruaitute demna kan nei lo. Keini BJP Mizoram hian MLA pakhat chiah nei mah ila, Mizoram record a ni tawh a, hmalam panin kan kal zel dawn a ni," an ti.

Hetihlai hian Mizoram BJP president thusawi hi Press Trust of India (PTI) chuan a ziak a, India ram hmun hrang hranga media-te chuan he thu hi an tarlang a ni.