January 10 aṭangin CAA hmang ṭan

Ministry of Home Affairs (MHA) chuan January 10, 2019 khan notification chhuahin, Citizenship Amendment Act (CAA) chu January 10, 2019 aṭanga hman ṭan a nih thu a tarlang.

Hriattirna tihchhuahah MHA chuan, "Citizenship Amendment  Act, 2019 (47 of 2019) Section 1 hnuaia Sub-Section (2)-in thuneihna a pek angin, Pakistan, Bangladesh leh Afghanistan ram aṭanga rawn raltlan, Muslim-te huam tel loa India khua leh tui nihna pekna dan chu sorkar laipui chuan a hman ṭan ni atan January 10, 2020 a puang a ni," a ti. 

CAA bill, Citizenship (Amend­ment) Bill, 2019 chu Par­liament chuan December 11, 2019 khan a pass a, President Ram Nath Kovind pawhin December 12, 2019 khan a pawmpui nghal. CAA atan hian rules erawh duang fel a la ni lo.

Hetih lai hian, India ram hmun hrang hrangah CAA duh lohna lantir chhunzawm zel a ni a, police-te'n mi eng emaw zat man tawhin, hliam pawh ṭhahnem tak an awm. Supreme Court-ah pawh CAA hêkna a lut a, mahse, ngaihtuah a la ni lo.

BJP kaihhruai sorkar laipuiin Mizoram leh India hmarchhak mipuite'n nasa taka an dodal Citizenship (Amendment) Act, 2020 (CAA) chu January 10, 2020 aṭangin gazette-ah chhuaha a hmang ṭan ta chu Congress party chuan pawi an tih thu leh Mizote leh hmarchhak mipuite BJP-in an zah lohzia tichiangtua an ngaih thu an tarlang. Mizoram Pradesh Congress Committee (MPCC) chuan thu­chhuah siamin, CAA chu sakhaw tih bik neia khua leh tui nih theihna tur dan a nih thu an tarlang a, "India Constitution duangtute rilru nena inmil lo, secularism kalh tlat a nih avangin Congress party chuan theihtawpin a dodal a. A kalphung leh a thil tum a ṭhat loh avangin Mizoram a huam emaw, huam lo emaw, Kristiante tan engti kawng maha thlàwp chi-ah kan ngai lo," an ti.

BJP chu Hindu lal ram din tumtu an ni tih sawiin MPCC chuan, "Hindu lal ram din an tumna thil MNF party-in thláwp a, theihtawp an chhuahpui mai hi Mizoram chanchinah leh political history-a thil la awm ngai lo a ni," an ti a; Mizorama CAA dodaltu apiang MNF hmelmaa an ngai leh CAA dodaltu mimal leh zirlai pawlte, ṭhalai intélkhawmte thlenga MNF-in nasa taka an bei let zel mai chu mak an tih thu leh, sakhaw pawi sawina dik tak, ngaihdam theih loh a nih thu an sawi.

BJP-in Hindu lal ram din an tumna hmanraw dang, Uniform Civil Code (UCC) pawh MNF-in an thláwp duh zel ang tih a rinawm thu sawiin MPCC chuan, "Chuvangin, kan hma lawka V/C leh AMC inthlan kan hmachhawn turah pawh Hindu lal ram dinna atana theihtawp chhuahpuitu MNF party hi mipuiin kan hnâwla kan paihthlak ngei a ngai a ni," an ti.