ASEP-in General Assembly an hmang
Association for Environmental Preservation (ASEP) chuan nimin khan Hotel Esquire, Sikulpuikawnah General Assembly vawi 14-na, 'Nungcha hmangaihtute inkhawmpui' tia an vuah chu an hmang a; 'Airgun changkang, scope vuah theih chi hian kan nungcha leh savate a suat nasat em avangin a khuahkhirhna kawngah sorkar hian chak lehzualin hma la rawh se,' tiin an rel.
ASEP Assembly-a an thurel zingah, airgun changkang, scope vuah theih chi khuahkhirh kawngah sorkarin chak lehzualin hma la se an duh thu te; protected areas (tiger reserve, national park leh sanctuary) 10-te humhalh, venhim leh tihchangtlun kawngah sorkarin chak lehzualin hma la rawh se, tih te; Serlui-B leh Tuirial Hydro electric tuikhuahte hi danin a phût ang ngeiin humhalh ni se, agri-tourism, water sports, etc. atan hmang loa ecology humhalh zui zawng zela hmalak ni rawh se, tih te; kum tin lo neih leh ram hâl hian ecosystem a tichhe nasa a, jhum cultivation hi bànsan a, sustainable cultivation chak taka kalpui a nih theih nan sorkarin hma la rawh se, tihte a tel.