No Vehicle Zone huam chhung kawngpuiah inzuar lo turin chah

Mizoram Merchants Association (MIMA) chuan thuchhuah siamin, kumin Krismas vuakvêta Aizawla No Vehicle Zone hman turah, Dawrpui Local Council-te nen ṭang­rualin No Vehicle Zone huam chhung kawngpuiah inzuar an awm loh nan hma an lak dawn thu leh an duty dawn thu an tarlang.

MIMA chuan, Dawrpui khawtlang hruaitute joint meeting thuchhuak angin, Dawrpui area chhungah thlamuang tak leh nuam taka mipui an kal vel theih nan kawngpuiah sumdawngte inzawrh phal a ni dawn lo tih an tarlang a, "Dawrpui joint meeting thuchhuak hi MIMA chuan a thlawp tlat a, Dawrpui khawtlang joint meeting duh ang hi zah a, mipui kal velna dâlin kawngpui/kawngkamah inzuar lo turin kan ngen. Inzuar lui enthli­thlai turin MIMA member an duty dawn a ni," an ti.

MIMA chuan, No Vehicle Zone kalpui hun tur (date) - December 21, 24 leh 31 chu duhthu a sâm lo tih sawiin, "Ni kar lak awma ruahmanna siam hi MIMA chuan ṭha lo kan ti a ni," an ti a; kum 2009-a inremna angin, December ni 23 chu Pathianni a nih avangin, December 21-ah No Vehicle Zone hmang tel loin, December 24 & 31 chauh hmang turin Mizoram sorkar an ngen tih an tarlang.