ZPM-in lirnghing tuarte tanpuina hlan

Zoram Peoples' Movement (ZPM) party hruaitute chuan July 7, Thawhlehni khan tunlaia lirnghingin a tihbuai mek Tuipuiral (East Tuipui bial)-a khuate an tlawh a, a ṭula hman atan Rs. 1,00,000 leh silpauline 300 chuang Tuipuiral Group YMA hnenah an hlân. ZPM president Lalliansawta chuan, lirnghing tuarte ṭanpuina tur sorkar laipuia bawhzui chak turin Mizoram sorkar an phût tih a sawi.

Thlawhlehni zan dar 7 khan ZPM hruaitute chuan Khawbung Zawlbukah Tuipuiral Group YMA hruaitute leh khawtlang hruaitute an kâwm a, Group YMA president Lalniliana'n a kaihruai. YMA assistant secretary R Lalremruata'n lirnghing an tawrh dan tlangpui sawiin, in ṭhiah ngai pahnih, luah zui tlak loh 16 leh thawm ṭhat ngai 160 chuang a awm bakah, ran thi pasarih leh lungrem chim a awm thu a sawi a ni.

ZPM President chuan, East Tuipui bial mipuiin lirnghing an tuar chu ZPM party-in an tawrhpui thu sawiin, an tih theih tam lo mah se, ṭul leh pawimawh atana an hman turin thilpek tlemtê pek an duh thu a sawi a; Mizoram sorkar chu a ngáwi rei an tih thu sawiin, "Tunah hian Prime Minister pawh lirnghing tuarte ṭanpui nan a inhuam zau viau niin kan hria a, Mizoram sorkar hi rang taka bawhzui turin kan phût a ni," a ti.

Lalliansawta chuan, "Lirnghing hi 'hlau suh u' intih theih ngawt a ni lo a, mihringte dan theih pawh a ni lo. A pawimawh ber chu Pathian hnaih a ni a, Pathianah chauh lo chuan inhumhimna leh thlamuanna tak tak a awm lo," a ti a; hlauhawm karah pawh Pathian hnaih zel turin a chah. ZPM hruaitu East Tuipui bial tlawhtute hi treasurer C Lalṭanpuia, general secretary C Lalthanfela leh Phairothanga, secretary H Lalramliana te, ZPM Ṭhalai president Malsawmzuala, general secretary Dr C Lalrammawia leh secretary Lalrinsanga te an ni a; nimin khan khaw hrang hrang an tlawh chhunzawm a ni.