Covid-19 vanga hna chánte thawh tur ngaihtuah a ni

Mizoram páwna hnathawk, Covid-19 lêng vanga hna chánte'n hna thawh tur an neih theih dan tur ngaihtuahin Mizoram Youth Commission (MYC) chairman Dr Vanlalṭanpuia'n nimin khan a pisaah soft skill training provider-te a kâwm.

Dr Vanlalṭanpuia chuan, Mizo ṭhalai, state páwna hna thawka chhuak, Covid-19 vanga Mizorama rawn hawte'n ei leh bar an thawh chhuah theihna tur kawng an zawn zel thu a sawi a, "Hetiang lama hma la thei tura ngaih department hrang hrang hotute leh bank leh financial institution hotute nen pawh kan sawiho tawh," a ti.

Meeting-ah hian Rural Development director Florence Zotluangpuii, MzSRLM director Lalchhandami, KVI Board chief executive officer F Lalrinenga, Women's Polytechnic principal Lalchhuanvela leh ITI principal Vanlalhruaia Sailo te an tel a; soft skill training hrang hrang awm theite bakah, dinhmun azira mamawh dan anga kalpui theih thilte an sawiho a ni.