Mizoram sorkarin eirûk awm lohna Sorkar din a intiam - Governor

Nimin khan Assembly session chhun­zawm a ni a, Governor Kummanam Rajase­kharan chuan thu sawiin, Mizoram sorkar chuan eirûk awm lohna sorkar din a intiam tih a sawi. Mizoram sorkar thara session hmasa ber December 18 aṭanga neih hi vawiinah chhunzawma zawh a ni ang.

Governor chuan, Mizoram sorkarin sorkar inrêlbàwlnaah danglamna thlen a tum tih sawiin, "Langtlang, mawhphurhna la ngam leh eiruk awm lohna sorkar din a intiam a ni. Lok Ayukta tihpuitlin tum a ni a, hmasawnna chak zawka a kal theihna atan leh inrelbawlna mumal zawka a kal theihna atan thuneihna sem zâi tum a ni. Kawng hrang hranga hmasawnna chak zawka a kal theihna atan a rang thei ang berin SEDP kalpui a ni ang," a ti.

Mizoram chu state tê zingah hmasawn chak ber state-ah thlan a nih thu sawiin Larsap chuan, "12th. Five Year Plan chhungin Mizoram GSDP chu 11%-in a ṭhang a, GSDP ṭhan chhan bulpui ber chu service sector a ni," a ti a; national average aia Mizoram per capita income a san zel theihna atan theih­tawp chhuah a nih tur thu a sawi.

Governor chuan, state hmasawn chak ber leh state rálmuang ber nia Mizoram sawi a nih ṭhinna vawnhim zel chu sorkar ngaih pawimawh tur a nih thu sawiin, "Kan state ramri venghim turin theihtawp chhuah a ni ang a, ramri hnaiha mipuite hmasawnna ngaih pawimawh a ni ang. Sorkar chuan a intiam ang ngeiin Mizoram tana nunna hlântu martar chhungte hamṭhatna turti hlawhtling turin theihtawp a chhuah dawn a ni," a ti.

Kummanam Rajasehekharan chuan, hmasawnna atan kawng ṭha leh inkal pawhna ṭha a pawimawh tih sawiin, "Kawng ṭha rang taka kan neih theihna atan sorkarin kawng buaipuitute a nawr dawn. Tunah hian kawng siamna lamah project 22 thawh mek a ni a, chu chu km. 827.20-a thui a ni. Chu'ng zinga project lian tham deuhte chu Kaladan Multi Modal Transit Transport Project , Serkhan-Bagha kawng siam mekte a ni," a ti a; hmasawnna hna thawh kawngah sorkarin theihtawp a chhuah tur thu a sawi.

Entepreneurship lamah Mizoram chu state ṭhang chak bera thlan a nih thu sawiin Larsap chuan, "Sorkarin kawng hrang hrangah ṭhalaite hmasawnna a ngai pawimawh dawn a, incentive-te pawh a ṭul angin ngaihtuahsak a ni ang. Ṭhalaite an dinchhuah theihna atan training leh awareness programme-te buatsaih ṭhin a ni dawn. Ṭhalaite'n chona thar an hmachhawn theihna tur atan theihtawp chhuah a ni ang," a ti.

Governor chuan, sorkarin mi zawng zawng health care scheme ṭha tak buatsaih sak a intiam tih sawiin, "Health care service tihhmasawn kawngah theihtawp chhuah a ni dawn a, hmanruate tihchiangtlun a ni ang," a ti a; MNF sorkar hmasak laia din Health Care Scheme chu ennawn a, chhunzawm leh a nih tur thu a sawi.

Mizoram sorkarin zirna siamṭhat a tum tih sawiin Larsap chuan, "Eng level-ah pawh zirna tihhmasawn a tum. Sikul ṭan hun chungchang a rang lama ennawn a ni dawn a, kan nunphung leh culture milin sikul ṭan hun bituk a ni ang. Zirtirtu sem rual hna pawh kalpui a ni ang a, CSS, government aided school, kohhran leh mimal enkawl sikula zirlaite leh zirtirtute hamṭhatna tur ngaih pawimawh a ni dawn," a ti.

Governor chuan, sorkar scheme leh programme-te tipuitling turin sorkar hna­thawkte fuih phur a, zalen taka hna thawhtir a pawimawh thu a sawi a; Mizoram mipuite chu sorkar thar ṭawiawm tura sáwmin, House member leh Mizoram mipuite Krimas leh kumthar chibai a bûk a ni.