IPR Minister-in Media-te thawhpuiah a sáwm

Information and Pub­lic Relations (IPR) minis­ter Lalruatkima chuan, sorkar policy-te leh sorkar halaknate puan­zar kawngah thuthar theh­darhtu (journalist)-te an pawimawh hle tih sawiin, journalist-te chu ṭha taka thawhpuiah a sáwm.

IPR Minister hian nimin khan a pisaah thu­thar thehdarhtute thingpui a inpui a; Lalruatkima chuan, sorkar hmalaknate, pawl thil tih hrang hrangte leh thil thleng eng pawh ni se, chanchin thara a lan a pawimawh tih sawiin, "Journalist-te hi a chhe lai siamṭhatu an ni. A ṭul chuan thurawn min pe ula, min sawisel ula, min zilh ula kan duh. Thiamna bik nei lo kan ni a, finchhuah leh ṭawiawm kan mamawh hle a ni," a ti.

IPR department-in tih tur leh mawhphurhna bik a nei tih sawiin Lal­ruatkima chuan, "A mawhphurhna a lian hle a, sorkar policy leh sorkar hmalaknate mipui zirtir an ngai a, chutah chuan IPR leh media-te an pawimawh hle a ni," a ti a; sorkar department hrang hrangte hmalaknate chu IPR kaltlangin puanzar ṭhin a nih dawn thu leh, chu'ngte chu a remchan anga media-a puangzar turin journalist-te a sáwm.

Chanchinbua ad­vertisement chhuah chung­changah chanchin­bute tan duhkhawp a awm hlei thei lo tih sawiin IPR Minister chuan, "Chief Minister kan sawipui ang a, a awm ang ang insem tlang turin hma kan la ang," a ti a; Mizoram Journalist Welfare Fund pawh a ṭul anga siamṭhat zel a nih tur thu a sawi.

Lalruatkima chuan, Mizoram Journalists' Association (MJA)-in a buaipui mek pension scheme/retirement benefit chungchangah, "Pension scheme hi a tihlawhtling-tu nih a chakawm hle," a ti a, engtianga tih tur nge la hre bik lo mah se, hmalakho zel a duh thu a sawi a; "MJA member-te tan kan inhawng reng a ni," a ti.

IPR Minister chuan, Mizoram sorkarin Kris­mas thilpek atan MGNREGS hnuaia inhlawhte hnenah ni li chhung inhlawhna tun hnai khan a pek chhuah thu a sawi bawk.

Minister Lalruatkima hian MJA Chairty Fund atan Rs. 10,000 a pe a, MJA president Zonun­sanga Khiangte hnenah a hlân a ni.