Inthlanah MPF-in lawmthu an sawi

Mizoram People Forum (MPF) chuan, December 18, Thawhlehni khan Governing Board an ṭhukhawm a, Mizoram inthlanpui neih zawh tak an thlir let tih a tarlang a, "Inthlanna duhawm tak kan nei thei niin kan hria a, lawmawm kan ti em em a ni. Inthlanna ṭha leh duhawm kan nei thei hi mipui ṭan lakna vang a ni a, mipui chungah lawmthu kan sawi tak meuh a ni," an ti.

MPF chuan, inthlanna zalen, thianghlim leh ṭha a awm theih nan political party-te nen Thawhhona Thuthlung an siam ṭhin tih sawiin, "Thawhhona Thuthlung a hlawhtlin theih nan theihtawpin ṭan kan la ho ṭhin," an ti a; kumin inthlanpuiah Thawhhona Thuthlung bawhchhiatna anga ngaih theih thil tlem azawng a awm a, chu'ng thilte chu party hruaitute nen sawihoin, ṭha takin an thawkho zel tih an tarlang.