KHAWTHLIR

Lunglei HPC Vice Chairman
Mizoram sorkar chuan Lunglei High Powered Committee vice chairman atan Lunglei North bialtu MLA Lawmawma Tochhawng a ruat. Lunglei HPC Vice Chairman ruatna hi nimin khan Planning secretary Dr C Vanlalramsanga'n a tichhuak a; hlawh leh hamṭhatna dangah minister of state tlukpuia dah a ni.

Hunpui sawiho
Lawngtlai DC N Chakhai hoin nimin khan a pisaah Krismas leh kumthar vuaveta Lungtlai district-ah boruak muanawm a awm theihna atana hmalak dan tur hrang hrang sawiho a ni. Meeting-a tarlan a nih danin, Lawngtlai district-ah hian sualna hrang hrang do tur leh boruak muanawm tak a awm theih nan Police leh tlawmngai pawlte an duty dawn a, dan bawhchhia an awm chuan dan anga hrem zel an ni ang. Lawngtlai District Police leh Central YLA hruaitute chuan duty dan turah ruahmanna an siam tawh a ni.

MJA an lawm
Mizoram Journalists' Association chuan thuchhuah siamin, mi harsate ṭanpuina tura MJA member-te aṭanga Charity Fund an khawnah MJA member ni lo mi eng emaw zatin pawisa an thawh avangin lawmawm an tih thu an tarlang. MJA tarlan danin, MJA Charity Fund-ah hian MJA member ni lo mi 17-in Rs. 47,425 an thawh a; MJA member-te thawh nen sum ṭhahnem tak an hmu a ni. Charity Fund hi MJA chuan vawiin hian Aizawl Civil Hospital Poor Fund-ah leh Guwahati, Kolkata leh Mumbai khawpuia Mizo welfare-te hnenah hlan an tum a ni.

Lehkhabu tlangzarh
Economics & Statistics department chuan nimin khan an pisa-ah Mizoram chhung dinhmun leh chanchin kimchang tarlanna lehkhabu, 'Mizoram At A Glance 2018 - Mizoram State Statistical Profile' an tlangzarh. He lehkhabu hi khualzin, sorkar hnathawk, researcher, zirlai leh mipui náwlpui tana ṭangkai tak ni tura beisei a ni.

Zawrh khap
Traffic SP H Ramthlengliana chuan thupek chhuahin, No Vehicle Zone hman hun December 21 leh 24 ah No Vehicle Zone huam chhung kawngpui sirah thawmhnaw leh bungrua zawrh a khap.