Lammualah Pawl Kût hman a ni

Social Welfare department bultumin nimin khan Lammualah Páwl Kût hman a ni. Kût hawngtu Governor Kummanam Rajasekharan chuan, mahni hnam ṭobul leh ziaráng hre lo mihring chu thingkung, zung nei lo ang an nih thu sawi.

Governor chuan, changkanna chi tinréngin mihring a bawh a, hma sawntir mah se, mihringpui'n mi an hriat hran theihna chu culture a nih thu a sawi a, "Mahni hnam ziaráng, inchei dan leh culture vawnhim leh chawisan hi mi tinin an mawha an lak a pawimawh. Hetiang kan tih loh chuan hnam anga kan nihnate hi a bo a hlauhthawnawm a, hnam anga kan hlutnate ngaihhlut nacháng kan hriat loh chuan engtikah emaw kan hnam nihphung a boral a hlauhawm a ni," a ti.

Larsap chuan, naktuka ram tana mi chhenfakawm leh khawtlang tana mi ṭangkai ni tur - ṭhalai leh naupangte chu thu ṭhaa kaihhruai a, nun hlutna ṭha leh dik nu leh pate'n an rochhiah a pawimawh tak zet tih sawiin, "Tun hmaa thlawhhmaa ṭhalai leh naupangte thawhrimna hriat reng nana pi leh púte'n Pawl Kût, naupang leh ṭhalai puala bik anga an lo nei kha tih âwm tak a ni," a ti a; Pawl Kût chuan Mizo hnam ziaráng a chawikan a, a chawi nun ngei a rin thu a sawi.

Khualzahawm Dr K Beichhua, Social Welfare minister chuan, Páwl Kût chu lawmthu sawina kût a nih tel tih sawiin, lawmthu sawina tur an ngaih thu a sawi a, "Kohhran leh mipuite'n sorkar ṭha zawk leh rorelna chak zawk te, ei leh bar leh hmasawnna chi hrang hranga hma kan sawn theih nan mi tinte ni tin an ṭawngṭai a, chumi hlawhtlinpui tura kan thlan chhuah sorkar thar hi min ṭawngṭaipui zel turin ka sáwm che u a ni," a ti.

Pâwl Kûtah hian hnam lam leh zai chi hrang hrang entir a ni a, naupang puala hun hman a ni bawk.