Robert Romawia'n officer-te a kâwm

Sports & Youth Services, Tourism leh Information & Communication department changtu minister Robert Romawia Royte chuan nimin khan a pisaah a department chan hrang hranga officer-te a kâwm a; office hun vawn dik ngaih pawimawhna kawngah mi dangte tihhmuhtu ni turin a chah.

Robert Romawia Royte hian ICT department-a officer-te a kâwm hmasa ber a; ICT chu hlemhletna dona, tihbona leh langtlang sorkar siamna hmanraw pawimawh tak a nih a beisei thu leh Good & Smart Governance siamna kawnga hma latu department ni tura hmalak a duh thu a sawi a, "Inbiakpawhna lama mawhphurtu service provider hrang hrangte kawm thuai ka tum," a ti.

Tourism department officer-te department hnathawh dan leh hna kalpui mekte sawipuiin Robert Romawia chuan, department-in chak zawka an kal theihna tura harsatna hrang hrang an sawite pawh a thei ang anga sutkianpui a tum thu a sawi.

SYS department-a officer-te nen an inkawmnaah Robert Romawia chuan, India leh khawvel huapa Mizote pholangtu chu sport a nih thu sawiin, "Ṭhalaite tun aia nasa zawka infiamna khawvela hma an sawn theih nana hmalak ka tum," a ti a; state budget-a innghat mai lo a, central ministry hrang hrang aṭanga sum tam zawk hai lut theih tura chak zawka hma la turin officer kalkhawmte a chah a ni.