Zu khap dan tur ngaihtuahtu tur Liquor Prohibition Coordination Committee din

Chief minister Zoramthanga chuan nimin khan Chief Minister's Office (CMO)-a Cabinet meeting room-ah tlawmngai pawl hrang hrang leh kohhran hruaitute a kâwm a; zu khap dan tur ngaihtuaha bawhzuitu tur Liquor Prohibition Coordination Committee an din.

CM Zoramthanga chuan, December 18-a Cabinet meeting-in zu hralh phalna titawp tura thutlukna a siam leh mimal agency-te'n an hralh chhuah loh nan dry day puan a nih thu a sawi a, "Heng hmalaknate hi a hlawhtlin theih nan kohhran leh tlawmngai pawlte nena thawhho leh mipui thlawpna a pawimawh a ni," a ti a; zu leh ruihhlo vanga buaina tâwkte enkawlna tur ngaihtuah thuai a nih tur thu a sawi.

Meeting-ah hian kohhran leh NGO hruaitute chuan sorkar thu­tlukna chu ṭha an tih thu an sawi a; state páwn aṭanga zu lo lut tur dan leh state chhunga dan loa zuarte khuahkhirhna kawnga hma la tur­in sub-committee din rawt a ni a, Liquor Prohibition Coordination Committee chu an din nghal.

Coordination Committee-ah hian Excise & Narcotics minister Dr K Beichhua chu chairman a ni a, vice chairman chu Home department secretary a ni. Secretary chu Excise & Narcotics secretary a ni a, Excise & Narcotics Commissioner assistant secretary-ah ruat a ni thung. Member atan IGP (Law & Order), DIG (Norther Range) leh Central YMA office bearer zawng zawng ruat an ni bawk. Committee hi vawiin hian Excise & Narcotics Minister pisaah an ṭhukhawm nghal ang.

Nimina meeting-ah hian deputy chief minister Tawnluia, Excise & Narcotics minister Dr K Beichhua, chief secretary Arvid Ray, Home secretary Lalnunmawia Chuaungo, Excise secretary KT Beicho, Law & Judicial secretary Marli Vankung leh department officer dangte an tel a; Central YMA, MHIP, MUP leh MIzoram Kohhran Hruaitute Committee hruaitute an tel bawk.