Chhim lamah total lockdown

Tun hnaiah BSF sipai zingah Covid-19 vei hmuh chhuah an awm nual bakah, Lawngtlai district mi pahnih, hripui veite'n Lawngtlai an panna kawnga an paltlang khua/veng ṭhenkhatah total lockdown kalpui mek a ni.

Lunglei Rahsi Vengah chuan BSF transit camp nen an inhnaih avangin camp bul velah leipui nei an awm nual avangin July 6, Thawhtanni zan aṭang khan total lockdown puan a ni a, July 10 thleng a awh phawt ang.

Lawngtlai district mi pahnih, tun hnaia Guwahati aṭanga rawn hawte'n two wheeler hmanga Lawngtlai district an panna kawngah Lunglei Bazar Vengah an lirthei kê an siamtir avangin dawr hawn an khap rih a; mi pahihte hian Ṭawipui North-I khuaah petrol an lei avangin Ṭawipui North-I ah hian total lockdown kalpui mek a ni bawk.

Lungleia police hotute hnen aṭanga thu dawn danin, BSF sipai zinga hripui vei an awm avang bawkin nizan dar 7 aṭang khan Lunglei Chanmari vengah total lockdown kalpui a ni a; Lunglei Salem Veng, Luangmual leh Sazaikawnahte total lockdown kalpui mek a nih thu dawn a ni.

BSF sipai zingah Covid-19 vei hmuh chhuah an awm tâk nual avang leh BSF sipai zingah Lunglei khaw­pui chhunga kal kual an awm nuala hriat a nih avangin, Lunglei khawpui chhunga an awm zel dan tur ngaihtuahin vawiin hian sorkar hotute an ṭhukhawm dawn nia thu dawn a ni bawk.