MFASA-in inkhawmpui an hmang

Mizoram Finance & Acounts Service Association (MFASA) chuan December 18, Thawhlehni khan Tourist Lodge, Chal­tlangah inkhawmpui an hmang a, kum 2018-19 chhunga an pawl hruaitu tur an thlang nghal.

Fuihna thu sawitu MFASA vice president Vanlal­sawma chuan, "Kan file khawih ṭheuhte phênah hian a nghawng mihring an awm zel tih kan hriat reng a pawimawh," a ti a, MFASA member-te chu mi harsa leh sawipuitu nei lote tana ding tlat ṭhin turin a chah.

Chawhnu lamah MFASA president Ramchhuana kaihhruaina hnuaia ro an rel a, department hrang hrangah financial adviser post siam a nih theih nana hmalak te, sorkarin financial management ṭha zawk a neih theih nana information technology hman ṭangkai leh MFAS member-te'n Integrated Financial Management Information System (IFMIS) an chhawr dan turte an rel a ni.

Kum 2018-19 chhunga MFASA office bearer atan Ramchhuana, Vanlalsawma, V Lalzamlova, VL Thlan­awma, Laldinpuia leh Thar­a Lungṭau te an thlang a ni.