Mizoram puma CD ratio 39.38%
July 7, Thawhlehni khan Secretariat Conference Hall-ah State Level Bankers Committee (SLBC), Mizoram meeting neih a ni. Mizoram pumah kum 2019-20 financial year chhunga bank hrang hranga sum dah luh chu vbc. 12,564 a nih laiin, loan pek chhuah zat chu cheng vbc. 4,947.77 a ni a, credit-deposit (CD) ratio chu 39.38% a nih thu tarlan a ni.
Meeting hi SLBC chairman Lalnunmawia Chuaungo, chief secretary-in a kaihruai a; kum 2019-20 financial year (April 2019 - March 2020) chhunga Mizorama bank hrang hrangte loan pek dan thlirho a nih bakah, kum 2020-21 chhunga sorkar scheme hrang hrang target duante an pawm.
Kum 2020-21 chhunga NRLM (MzSRLM) hnuaia loan pek tur cheng vbc. 70.05 te, Self Employment Programme hnuaia loan pek tur cheng nuai 8.93 leh PMAY-Urban hnuaia chenna in 2,000 sakna turte an pawm a ni. Lalnunmawia Chuaungo chuan, Mizorama bank-te CD ratio chu state dangte aiin a la hniam hle tih sawiin, "A chhan chu bank-te'n loan an pek chhuah tlem vang a ni," a ti. Mizorama bank-te chu a welcome rualin, loan pek chungchangah beiseina sang tak an lakah a neih thu a sawi a; bank ṭhenkhat, a bikin private bank-te chu sorkar aṭang leh mipui deposit aṭanga sum dawng tur ringawt ni loin, state hmasawnna tura mipui hnena loan pek chhuah kawnga hmasawn tur an ni tih hre turin a chah.
Mizorama bank dinhmun (April 2019 - March 2020)
1. Bank awm zat - 26
2. Bank branch zat - 210
# Public sector bank branch - 81
# Private sector bank branch - 24
# Regional rural bank branch - 86
# Cooperative bank branch - 19
3. Sum dah luh (deposit) - vbc. 12564
4. Advances (loan, etc.) - vbc. 4947.77
5. CD ratio - 39.38%
6. Priority sector advances - vbc. 2661.88
7. Advance aṭanga priority sector lending - 53.80%
8. Advance to agriculture - vbc. 628.42
9. Agriculture advances - 12.70%
(total advance aṭangin)
10. MSME advances - vbc. 996.25 (20.13%)
(industry & business)
11. FY 2019-20 chhunga Annual - 56%
Credit Plan achievement
12. FY 2019-20 chhunga priority - 34%
sector achievement