KHAWTHLIR

Aizawl DC chuan thupek chhuahin, National Disaster Response Force (NDRF) camp, Lungverha awmte zinga mi 15-in Covid-19 an vei tih hmuh chhuah a nih avangin, 5th Battalion IR camp, Lungverh leh a chhehvel chu tlawhpawh phal loh (containment area)-ah a puang. Containment area chhungah hian Aizawl DC-in phalna a pekte bakah, medical leh security duty-te tih loh chu luh leh chhuah phal a ni lo.

State Referral Hospital (ZMC)-ah Covid-19 vei enkawl mek mi 23 an awm a, mipa 20 leh hmeichhia pathum, kum 3-56 inkar, Aizawl district mi vek an ni. SRH-ZMC Covid-19 Bulletin chuan, hripui vei an enkawl mek zingah ngaihtuahawm an awm lo tih a tarlang. SRH-ah hian Covid-19 mi 75 an enkawl tawh a, chu'ng zinga mi 48 chu an chhuak tawh a ni.

MHIP General Headquarters chuan thuchhuah siamin, Lalthla-muana s/o VK Paul (L), Lungdai Chhimvengin a nupui Lalremruati d/o Lalhmingmawia (L) a sawisa hlum chu an dem thu an tarlang. MHIP chuan, July 6, 2020-a Lalthlamuana'n a nupui Lalremruati nghaisa a, râwng taka a that hi kan dem tak zet. Lalthlamuana hi dan anga na taka hrem turin thuneitute kan phût tlat a ni," an ti.

Mamit Officers' Club (MOC) chuan Covid-19 dona atana an hmalakna 'Mask & Sanitizer for All' hnuaiah nimin khan Mamit khawpui chhunga dawr 9-ah a duh apiang tana lak theih turin hmaituamna an dah bakah, pisa hrang hrang­ah an dah. MOC hian Covid-19 dona atan a ṭul a piang a hman turin Mamit CMO hnenah Rs 15,000 leh Mamit SP hnenah Rs 10,000 an hlan bawk.

Mizoram Govt. Medical Laboratory Technician Association (MGMLTA) chuan thuchhuah siamin, Covid-19 vei leh vei loh zawn chhuahna kawnga rim taka thawktu laboratory technician-te thawhrimna leh inpeknaa ropui an tih thu an tarlang a, "Hlawh phût hauh loa inpe laboratory technician zawng zawng chungah lawmthu kan sawi. Covid-19 dona kawnga Health Minister leh department-te thawhrimna leh remhriatna kan ngaisang hle a ni," an ti.

Lawngtlai district mi pali - Ellen Grace Chinzah leh Daisy Vanlalliandingi, Lawngtlai Vengpui-II ve ve, H Lal­hmangaihpuii, Council Veng leh HC Zonun­tluangi, College Vengte chu Covid-19 donaa a ṭul apiang hlawh nei loa thawk turin an inpe. Mi palite hi nimin khan Lawngtlai District Task Force hnenah an inpe a, Lawngtlaia quarantine centre enkawlnaah an thawk dawn a ni.

Home leh DMR secretary Lalbiaksangi chuan nimin khan Siaha District Emergency Operation Centre (DEOC) leh Siaha District Jail a tlawh. Lalbiaksangi hian Siaha DEOC-in rikrum thila hman tur bungraw hrang hrang an neihte a enfiah a, Siaha DC chuan mamawh an neihte a lo thlen. Jail a tlawhnaah Home Secretary chuan jail tangte chu danin an chunga ro a rel angin thu awih taka awm turin a fuih.

Tourism department chuan Lengpui Model Branch YMA nen ṭang dunin nimin khan Lengpui Airport kawngah 'Beautification Drive' huaihawtin an hnatlang a, Tourism secretary Esther Lalruatkimi hoin an hmanpui. Hnatlangah hian mi ṭhahnem tak an thawk chhuak a, airport panna kawngpui kamah Saron eng emaw zat an phun a ni.