Larsap leh CM-in Krismas leh kum thar hlim taka hmang turin duhsakna an hlan

Governor Kummanam Rajasekharan leh chief minister Zoramthanga te chuan nimin khan Krismas leh kum thar lo thleng tur atan thuchah an siam a; Mizo mipuite chu hlim taka Krismas leh kum thar hmang turin duhsakna an hlan.

Larsap chuan, Mizorama Krismas vawi khat a hmanna tur a nih thu sawiin, "Kum chanve âwrh chiah Mizoramah ka la awm a, in ngainatawm bakah, in bula chen nuam ka tih tawh tak zet. In hawihhâwmnate leh in mi ngaihsakna zawng zawngah in chungah lawmthu ka sawi a ni. He hun pawimawh takah hian Zoram dung leh vânga chhungkaw tinte hnenah Krismas leh kum thar chibai leh duhsakna sang ber ka hlan a ni," a ti.

Krismas chu hun lawmawm bik a nih thu sawiin Rajashekharan chuan, "He hunah hian kan mihringpuite hnena duhsakna hlan hi kan tih tur a ni ang. He hun kan hman chhan chu Pathianin a fapa mal neihchhun, Isua Krista chu lei leh van inrem tawh lote an lo inrem leh theihna tura khawvelah a rawn tirh ní kan hriatrengna atan a ni," a ti a; Krismas-ah chuan inan lohna leh danglamna zawng zawngte dahṭha a, mi zawng zawng nen inrem taka awm turin Mizo mipui a sáwm.

Governor chuan, kum 2019 a thleng mai dawn tih sawiin, "Awmhmun aṭanga kan hma lam hun ka lo thlir hian, beiseina êng tak ka neih bakah, phûrnain ka khat a ni. Hlawhtlinna nasa zawk leh hmasawnna lian zawk thawk chhuak turin khua leh tuite'n sorkar kan thlawp tlat a pawimawh ber tih hi hre thar leh turin kan inngen nawn a ni. Thil dang dangah kan ṭhat viau rualin, hriselna kawng bika kan chhe lutuk erawh hi chu thil pawi tak a ni a, kan insiamṭhat ngei ngei a ngai," a ti.

Chief minister Zoramthanga chuan, Krismas leh kum thar lo thleng tur chu Mizo mipui zawng zawngte'n hlim taka an hman theihna atan duhsakna sang ber a hlan tih a sawi a, "Pathianin a fapa Lal Isua khawvela a rawn tirh chhan, 'Lei chunga a lawm em em mihringte hnenah remthu leng rawh se' tih a nih angin, inrem taka awm hi kan duh ber a ni," a ti a; remna leh muanna a awm zel theihna atan sorkarna chelhtute'n theihtawp an chhuah zel tur thu a sawi.

Mizoram chhehvel Bangladesh, Myan­mar, Manipur, Assam leh Tripura-te chu remna leh muanna nei lo an nih thu sawiin Chief Minister chuan,

"Hengte hian remna leh muanna an neih loh chuan Mizoramin remna leh muanna kan neih loh phah thei a ni. Mizote hi Pathianin remna leh muanna a awm theihna atana thawk turin min duh. Chuvangin, Mizo mipuite pawh kan ṭawngṭaina zawng zawngah remna leh muanna a awm theihna atan dil zel turin ka ngen che u a ni," a ti.