Mizoram tan i thawkho ang u - HM Chama

Home minister Lal­cham­liana chuan nimin khan a pisaah thuthar thehdarhtute lengah sáwmin thingpui a inpui a, Mizoram tana thawhpuiah a sawm bakah, Mizoram mipuite hlim taka Krismas leh kum thar hmang turin duhsakna a hlân.

Lalchamliana chuan, thuthar thehdarhtute pawimawhzia a hriat thu leh amah pawhin chan­chinbu a enkawl tawh

ṭhin thu a sawi a, "Keini hi kan ṭan tlàn chuan kan ram tan thil ṭha tak kan ti thei ngei ang. Mizoram tan i thawkho ang u," a ti a; press mite chu thawhpuiah a sáwm a ni.

MJA president Zonun­sanga Khiangte pawhin thu sawiin, Home Minister chu chanchinbumite'n an nêl leh an ngamtlak a ni tih a sawi a; sorkar thara minister-te'n press mite hlat lo se a duh thu sawiin, "Sorkar hmasaah khan kum 10 chhunga press mite kâwm miah lo an awm nual a. Tun sorkara minister-te hi chuan press mite hlat lo se, a khat tâwkin press mite kâwm fo se la a duhawm hle ang," a ti.

IGP (Law & Order) LH Shanliana chuan Home department hnuaia police dinhmun leh hmalaknate a sawi a; Delhi Police-ah Mizo

ṭhalai 50-60 vel an awm mek thu sawiin, "Delhi-ah Mizo 3,000 vel an awm reng a, harsatna nei pawh an awm ve reng; chutiang karah chuan Delhi Police-a Mizote an ṭangkai hle a ni," a ti a; Delhi Police-in kum thar lamah Mizo eng emaw zat an la leh dawn a, Mizo ṭhalai a tam thei ang berin luh tum se a ṭhat thu a sawi.

LH Shanliana chuan, sorkar policy angin Mizorama zu dawr, sorkar agency-in an siamte chu Excise & Narcotics lamin an khalsak vek tawh thu a sawi a, "Tuna stock awm sate hi engtianga tih zui tur nge kan la hre rih lo a, la ngaihtuah zel tur a ni," a ti.

Krismas leh kum thar mipuiin muan­awm taka an hman theih nan police-in ṭan an la a, checkgate awm lohnaah pawh checkgate siam thar a nih thu sawiin LH Shanliana chuan, "YMA, MTP, YLA-te nen kan thawhho a, Social Welfare aṭanga cheng nuai 16.5 kan hmuh hmangin checkpost-te siam belh a ni," a ti a; Aizawlah pawh checkpost pakua an siam thu a sawi.

IGP sawi danin, Krismas leh kum thar muanawm taka hman a nih theih nan Police-in Aizawl khawpui fang kual tur mobile patrolling team pali an siam a, Police Headquarters aṭangin an mamawh ang motor an pe a ni.
State Tax Commissioner pawhin an dinhmun tlangpui a sawi a; kum 2018-19 financial year-a chhiah an lak luh tur target chu cheng nuai 37,400 a ni a, November, 2018 thlengin cheng nuai 35,361.93 an hmuh tawh thu leh, chu chu an target aṭangin 94% vel a nih thu a sawi.