KHAWTHLIR

Operation Evil Dead-II
Mizoram sorkar chuan thuchhuah siamin, Krismas leh kum thar vuakvetah Aizawl SP kaihhruainain sorkar khap thil, a bikin zu leh ruihhlo hrang hrangte beihpui thlakna 'Operation Evil Dead-II' kalpui tum a nih thu a tarlang. Sorkar thuchhuah tarlan danin, Operation Evil Dead-I chu inthlanpui neih laiin hlawhtling taka kalpui a ni tawh a, zu leh a kaihhnawih eng emaw zat man leh tihchhiat a ni. Krismas leh kum thar vuatvetah pawh police-te'n nasa takin ruihhlo dap leh man chhuah beihpui thlak zel an tum a, team hrang hrangah insiamin veng hrang hrangah hma an la a ni.Mizoram Police chuan, an hmalakna kawng hrang hrangahte department hrang hrang, tlawmngai pawlte leh media-te thlawpna an ngen a ni.

Chibai bûkna hlan
Social Welfare minister Dr K Beichhua chuan, Mizoram chhunga naupang enkawlna home hrang hrangte hnenah Krismas chibai bûk pawisa a hlan a; home naupangte'n Krismas leh kum thar hlim leh lawm taka an hman theih nan duhsakna a hlan bawk.

Dy. Chief Whip
Chief minister Zoramthanga chuan Dampa bialtu MLA Lalrintluanga Sailo chu Deputy Government Chief Whip atan a ruat. Deputy Chief Whip ruatna hi December 19, 2018 khan Political & Cabinet department-in a tichhuak a ni.

Minister pek belh
Minister of state Dr K Beichhua chu department a enkawl tawh sa pathumte bakah, Animal Husbandry & Veterinary department pek belh a ni. AH&Vety hi MNF minis­try siam tirah deputy chief minister Tawnluia chan a ni a; Dr K Beichhua hian AH&Vety bakah, Social Welfare, Excise & Narcotics leh Sericulture department-te a enkawl dawn ta a ni.

Republic Day
Nimin khan Aizawl DC Dr A Muthamma hoin DC conference hall-ah January 26, 2019-a Aizawla Republic Day hman dan tur sawiho a ni. Meeting-a tarlan a nih dan chuan, parade-ah school contingent 14 awm thei tura beisei a n a, parade-a tel tur sikul naupangte hriselna chu January 9 leh 10, 2019 ah endik a ni dawn a, parade contingent-a tel tur a bik takin sikul naupangte chu an ei leh in tur ngaihtuahsak an ni ang.