Aadhaar card siam tum an tam

India ram pumah National Portability of NFSA NSA Ration Card (One Nation, One Ration) kalpui tura tih a nih avangin nimin khan Aizawl DC office-a Census Cell-ah Aadhaar card siam tum an tam hle.

Thu dawn danin, ration card hman lai chu siam ṭhat vek a ni dawn a, ration card thar nei lo tan buhfai lâk theih a ni tawh dawn lo. Hei vang hian Aadhaar card nei lote chu ration card-ah an tel thei tawh dawn loh avangin, Aadhaar card nei lote chu siamtir thuai tura hriattirna chhuah a ni. Aizawl DC office-a Census Cell chuan March 18, 2020 aṭanga Aadhaar card pek chhuah an khâr chu nimin khan an hawng leh ṭan a, nimin bikah mi 200-te Aadhaar card an siamsak hman thu Vanglaini an hrilh.

Aadhaar card siam tum zingah siamtir thei loa haw leh mi tam tham tak an awm a, chu'ng zingah chuan thingtlang mi ṭhahnem tak an tel. Aadhaar siamtir turin mahni ngei kal a ngaih avangin, siam tuma intlar zinga a tam zawk chu naupang an ni a, intlar/nghak thlawn pawh mi eng emaw zat an awm. Aadhaar siamtir tum zinga mi eng emaw zat chu hun eng emaw chen Aadhaar siam theih loha khâr a nih vang a ni a; chutih laiin, sakawlh number tia Aadhaar card hlau eng emaw zat pawhin an siamtir nia thu dawn a ni bawk.

One Nation, One Ration hnuaia ration card thar turah chuan, chhungkaw hming chuang zawng zawng Aadhaar card xerox copy, ration card holder bank account xerox copy, card holder passport photo copy, gas connection number lanna xerox copy leh card holder phone number telh tawh tur a ni a; chu'ng document-te chu July 10, 2020 thleng mahni buhfai lâkna retailer-ah thehluh tura tih a ni.